തിരുവനന്തപുരം : കേരളത്തിലെ ആര്ടിപിസിആര് ടെസ്റ്റിന്റെ നിരക്ക് 1700 ല് നിന്നും 500 ആക്കി കുറച്ചിട്ടും സ്വകാര്യലാബുകള് അനുസരിക്കാത്തത് സംസ്ഥാന സര്ക്കാരിന്റെ അനാസ്ഥയാണെന്ന് ബിജെപി സംസ്ഥാന അധ്യക്ഷന് കെ. സുരേന്ദ്രന്. ഇത് സര്ക്കാരുമായുള്ള ഒത്തുകളിയുടെ ഭാഗമാണെന്നും അദ്ദേഹം പറഞ്ഞു.
മറ്റു സംസ്ഥാനങ്ങളേക്കാള് മൂന്നിരട്ടി പണം സംസ്ഥാനത്തെ സ്വകാര്യ ലാബുകള്ക്ക് പിഴിഞ്ഞെടുക്കാനുള്ള അവസരമുണ്ടാക്കിയത് സര്ക്കാരായിരുന്നു. ബിജെപി ഉള്പ്പെടെയുള്ള രാഷ്ട്രീയ പാര്ട്ടികളുടെയും ജനങ്ങളുടെയും ശക്തമായ എതിര്പ്പ് ഉയര്ന്നതുകൊണ്ട് മാത്രമാണ് സര്ക്കാര് ആര്ടിപിസിആര് നിരക്ക് കുറയ്ക്കാന് തയ്യാറായത്.
എന്നാല് നിരക്ക് കുറച്ച് നിലവില് വന്നിട്ടും ആദ്യത്തെ നിരക്കില് തന്നെ ടെസ്റ്റ് നടത്താനുള്ള ധാര്ഷ്ട്യം കാണിക്കുകയാണ് സ്വകാര്യലാബുകള്. നിരക്ക് കുറയ്ക്കാത്ത ലാബുകള്ക്കെതിരെ സര്ക്കാര് ശക്തമായ നടപടി സ്വീകരിക്കണം. കൊവിഡ് രൂക്ഷമായ സാഹചര്യത്തില് മുതലാളിമാരുടെ ഇങ്കിതത്തിന് വഴങ്ങുന്നതില് നിന്നും പിണറായി സര്ക്കാര് പിന്മാറണം. ഇല്ലെങ്കില് ശക്തമായ സമരങ്ങള് നടത്താന് ബിജെപി നിര്ബന്ധിതമാവുമെന്നും കെ.സുരേന്ദ്രന് പ്രസ്താവനയില് പറഞ്ഞു.
