പുച്ചാക്കല്: വിവാഹ ദിവസം പ്രതിശ്രുതവരനെ കാണാതായ സംഭവത്തില് പോലീസ് അന്വേഷണം ഊര്ജിതമാക്കി. പാണാവള്ളി പഞ്ചായത്ത് പത്താം വാര്ഡില് ചിറയില് അലിയാരുടെ മകന് ജെസിമി(28)നെയാണ് കാണാതായത്.
സൈബര് സെല്ലിന്റെ സഹായത്തോടെ അന്വേഷണം ഊര്ജിതമാക്കിയതായും പ്രത്യേക സ്ക്വാഡ് രൂപീകരിച്ചതായും പൂച്ചാക്കല് സി.ഐ: അജി ജി. നാഥ് പറഞ്ഞു. കഴിഞ്ഞ 21ന് അരുക്കുറ്റി സ്വദേശിനിയായ ഇരുപത്തിരണ്ടുകാരിയുമായി വിവാഹം നടക്കേണ്ടതായിരുന്നു.
വിവാഹദിവസം രാവിലെ പൂവ് വാങ്ങാന് സുഹൃത്തിന്റെ ബൈക്കില് അരൂരില് പോകുകയാണെന്ന് പറഞ്ഞാണ് വീട്ടില്നിന്ന് ഇറങ്ങിയത്. സമയം കഴിഞ്ഞിട്ടും എത്താത്തതിനെത്തുടര്ന്ന് വിവാഹം മുടങ്ങി. പിന്നീട് അയല്വാസിയായ യുവാവിന്റെ മൊബൈല് ഫോണിലേക്ക് തന്നെ ചിലര് തടഞ്ഞുവച്ചിരിക്കുകയാണെന്ന ഇയാളുടെ സന്ദേശം വന്നു.വിവാഹം മുടങ്ങിയതിനെത്തുടര്ന്ന് പെണ്കുട്ടിയുടെ ഉപ്പാപ്പ കുഴഞ്ഞുവീണ് മരിച്ചു.
