സ്വാമി സുധീര് ചൈതന്യ
രാമദൂത്, അതുലിത ബലധാമ, പവനസുതന് എന്നിങ്ങനെയുള്ള ഹനുമാന്റെ വിവിധ നാമങ്ങള് പരസ്പര ബന്ധിതങ്ങളാണ്.
അതുലിത ബലവാന് ആകണമെങ്കില് രാമദൂതന്, പവനസുതന് എന്നിവ സൂചിപ്പിക്കുന്ന കര്മയോഗ, വൈരാഗ്യഭാവങ്ങള് ഉണ്ടായിരിക്കണം.
‘മഹാബീര വിക്രമ ബജരംഗി
കുമതി നിവാര സുമതി കേ സംഗീ’
(അര്ഥം: മഹാപരാക്രമിയായ അങ്ങയുടെ ശരീരം വജ്രതുല്യമത്രേ. അവിടുന്ന് സാധകരുടെ മനോമാലിന്യങ്ങള് നീക്കി അവരുടെ മനസ്സ് ശുദ്ധീകരിക്കുന്നു).
മഹാബീര: മഹാനായ വീരന് എന്ന ഈ വിശേഷണം ഹനുമാന് സ്വാമിക്ക് തീര്ത്തും യോജിച്ചത് തന്നെ. സാമാന്യ അര്ഥത്തിലും അതേ പോലെ മഹാവീര് എന്ന പദത്തിന്റെ സാങ്കേതിക അര്ഥത്തിലും ഹനുമാന് ഇത് യോജിക്കുന്നു.
അഞ്ച് വീരതകള് ഉള്ളയാളെയാണ് മഹാവീര് എന്നു വിളിക്കുക.
1. ത്യാഗവീര് (ധര്മവീര്)
ധാര്മ്മിക ജീവിതം നയിക്കുന്നതിന് പല ത്യാഗങ്ങളും ചെയ്യേണ്ടി വരും. ത്യാഗത്തിന് ഉപേക്ഷിക്കല് എന്നാണ് സാധാരണ പറയാറുള്ളത്. ഇത് നിവൃത്തികേടുകൊണ്ടുള്ള ഉപേക്ഷിക്കലല്ല. അതേസമയം, തനിക്ക് ഇത് ആവശ്യമില്ല എന്ന ബോധ്യം വരുമ്പോള് പക്വതയോടു കൂടിയ ഉപേക്ഷിക്കല് ആണത്.
വലിയ ലക്ഷ്യങ്ങള്ക്കായി ചെറിയ കാര്യങ്ങള് ഉപേക്ഷിക്കുക എന്നര്ഥം. മുമ്പോട്ടുള്ള യാത്ര അഥവാ ഉയരങ്ങളിലേക്കുള്ള യാത്രയ്ക്ക് ഭാരമായി മാറുന്ന കാര്യങ്ങള് മടിയേതും കൂടാതെ ത്യജിക്കാനാവണം. അനാവശ്യ കെട്ടുപാടുകളും ഭാണ്ഡങ്ങളും യാത്രയുടെ വേഗം കുറയ്ക്കും. യാത്രക്കാരനെ തളര്ത്തുകയും ചെയ്യും.
2. ദയവീര്:
വേറൊരാളുടെ ദുഃഖം കാണാന് ഇഷ്ടമല്ലാത്ത, അതേസമയം അവരെ ദുഃഖത്തില് നിന്ന് കരകയറ്റാന് മനസ്സുള്ള ഒരാള്. മറ്റൊരാളെ, അയാള് എങ്ങനെയാണോ, അങ്ങനെ തന്നെ ഉള്ക്കൊള്ളാന് കഴിവുള്ള ആള്, ലോകം ഒരു കുടുംബം എന്ന കാഴ്ചപ്പാടോടെ സഹജീവികളെ ബന്ധുവായി കണ്ട് ഇടപെടാന് കഴിവുള്ളയാള് ഇതെല്ലാമാണ് ദയവീര്.
വിദ്യാവീര്: അറിവ് ആര്ജിച്ച് വീരനാകുക. പഠനം ഒരിക്കലും നിലയ്ക്കുന്നില്ല. നിലയ്ക്കാനും പാടില്ല. അവസാന ശ്വാസം വരെ ഒരാള് പഠിച്ചു കൊണ്ടേ ഇരിക്കണം. അറിവ് ശരിയായ ദിശയിലേക്കാവണം.നമുക്കെല്ലാവര്ക്കും ലൗകികമായ അറിവും ആധ്യാത്മികമായ അറിവും ആവശ്യമാണ്. സമൂഹത്തിന് നമ്മുടെ സാന്നിധ്യം ഫലവത്താകണമെങ്കില് ശരിയായ അറിവ് അനിവാര്യമാണ്. നമുക്ക് തന്നെ നാം ഉപകാരപ്പെടാന് ആധ്യാത്മിക അറിവും വേണം.
