മുംബൈ: മുകേഷ് അംബാനിയുടെ ആഡംബരവസതിയായ ആന്റിലയ്ക്ക് 600 മീറ്റര് അരികെ സ്ഫോടകവസ്തുക്കള് നിറച്ച എസ് യുവി കാര് ഉപേക്ഷിച്ച നിലയില് കണ്ടെത്തിയ കേസില് പൊലീസ് ഉദ്യോഗസ്ഥന് സച്ചിന് വാസെ അറസ്റ്റിലായി. ഈ പദ്ധതി ആസൂത്രണം ചെയ്തതിന് പിന്നില് സച്ചിന് വാസെ ഉള്പ്പെട്ടിരുന്നു എന്നാണ് കണ്ടെത്തല്.
ഇതോടെ മഹാരാഷ്ട്രയിലെ ശിവസേന സര്ക്കാര് കൂടുതല് പ്രതിരോധത്തിലായി. കാരണം ഒരിക്കല് പൊലീസില് നിന്നും രാജിവെച്ച സച്ചിന് വാസെ ശിവസേന പ്രവര്ത്തകനായിരുന്നു. എന്നാല് കോവിഡ് കാലത്ത് പൊലീസ് സേവനം കൂടുതല് കാര്യക്ഷമമാക്കാന് എന്ന് പറഞ്ഞ് ശിവസേന തന്നെ സച്ചിന് വാസെയെ വീണ്ടും സര്വ്വീസില് തിരികെ എടുത്തു. സച്ചിന് വാസെയ്ക്കെതിരെ നടപടിയെടുക്കാന് ഉദ്ദവ് താക്കറെ തയ്യാറില്ലാതിരുന്നപ്പോള് ഒടുവില് ശരത്പവാറിന്റെ നിര്ദേശമനുസരിച്ചാണ് സച്ചിന് വാസെയെ ക്രൈംബ്രാഞ്ചില് നിന്നും സസ്പെന്റ് ചെയ്തതെന്നും പറയുന്നു.
അംബാനിയുടെ ആഡംബര വസതിയ്ക്ക് മുന്പില് ജെലാറ്റിന് സ്റ്റിക്കുകള് നിറച്ച വാഹനം കണ്ടെത്തിയ കേസ് ആദ്യം അന്വേഷിച്ചത് സച്ചിന് വാസെയായിരുന്നു. പിന്നീട് അത് ആന്റി ടെററിസ്റ്റ് സ്ക്വാഡിനും എന് ഐഎയ്ക്കും കൈമാറി.
എന്നാല് കഴിഞ്ഞ ദിവസം മന്സുഖ് ഹിരന്റെ ഭാര്യതന്നെ ഇത് ഒരു കൊലപാതകമാണെന്നും ശിവസേന നേതാവ് ധനഞ്ജയ്ഗൗഡയുമായി അടുത്ത ബന്ധമുള്ള പഴയ എന്കൗണ്ടര് സ്പെഷ്യലിസ്റ്റായിരുന്ന, ഇപ്പോള് ക്രൈംബ്രാഞ്ചില് ഉദ്യോഗസ്ഥനായ സച്ചിന് വാസെയാണ് മന്സുഖ് ഹിരന്റെ കൊലപാതകത്തിന് പിന്നിലെന്ന് ആരോപിച്ചതോടെയാണ് കേസ് കൂടുതല് വിവാദമായത്. സ്ഫോടകവസ്തുക്കള് നിറച്ച് ഉപേക്ഷിച്ച നിലയില് കണ്ടെത്തിയ എസ് യുവി കാറിന്റെ ഉടമസ്ഥനാണ് മുന്സുഖ് ഹിരെന്. ഇദ്ദേഹം സംഭവത്തിന് ഏതാനും ദിവസത്തിന് ശേഷം അപ്രത്യക്ഷമാവുകയും പിന്നീട് മരിച്ച നിലയില് മന്സുഖ് ഹിരന്റെ ജഡം ഒരു കടലിടുക്കില് കണ്ടെത്തുകയുമായിരുന്നു. മാത്രമല്ല, മന്സുഖ് ഹിരന്റെ മൊബൈല് ഏറ്റവുമൊടുവില് കാണിച്ച ലൊക്കേഷന് ശിവസേന നേതാവ് ധനഞ്ജയ് ഗൗഡയുടെ ഓഫീസിന് സമീപം എന്നായിരുന്നുവെന്നും പറയുന്നു. ഇതെല്ലാം വിരല് ചൂണ്ടുന്നത് മഹാരാഷ്ട്രസര്ക്കാരും മന്സുഖ് ഹിരന്റെ കൊലപാതകവും തമ്മിലുള്ള ബന്ധമാണ്.
ബിജെപി നേതാവ് ദേവേന്ദ്ര ഫഡ്നാവിസ് സച്ചിന് വാസെയ്ക്കെതിരായ ആരോപണം കഴിഞ്ഞ ദിവസം നിയമസഭയില് ഉന്നയിച്ചതോടെ മന്സുഖ് ഹിരന്റെ മരണം മാധ്യമങ്ങളില് ചൂടുള്ള ചര്ച്ചയായി മാറിയിരുന്നു. ഇതേ തുടര്ന്നാണ് മഹാരാഷ്ട്ര ആഭ്യന്തരമന്ത്രി അനില് ദേശ്മുഖ് തന്നെ സച്ചിന് വേസിനെ ക്രൈംബ്രാഞ്ചില് നിന്നും മാറ്റാന് തീരുമാനിച്ചത്.
ടൈംസ് നൗ റിപ്പോര്ട്ടനുസരിച്ച് ഒല ഡ്രൈവര് പറഞ്ഞത് മന്സുഖ് ആദ്യം വിക്രോളിയില് നിന്നും ക്രോഫോര്ഡ് മാര്ക്കറ്റിലേക്ക് പോകാനാണ് കാബ് വിളിച്ചതെന്നാണ്. എന്നാല് അവസാനനിമിഷം തീരുമാനം മാറ്റുകയും സൗത്ത് മുംബൈയിലെ ഒരു പ്രമുഖ ഹോട്ടലിലേക്ക് പോകാന് തീരുമാനിക്കുകയും ചെയ്തു. ആരെയാണ് ഹിരെന് ഹോട്ടലില് കണ്ടത് എന്നത് ചോദ്യമായി അവശേഷിക്കുന്നു. മുംബൈയിലും താനെയിലും കേസുമായി ബന്ധപ്പെട്ട് എന് ഐഎ പലയിടത്തും റെയ്ഡ് നടത്തിക്കഴിഞ്ഞു.
ഇന്നോവാ കാറില് രക്ഷപ്പെട്ട രണ്ട് പേരെ കണ്ടെത്താന് ശ്രമം നടക്കുന്നുണ്ട്. പിപിഇ കിറ്റ് ധരിച്ച് അംബാനിയുടെ വീടിന് പുറത്ത് സിസിടിവി ദൃശ്യത്തില് കാണപ്പെട്ട അഞ്ജാതനെയും തിരയുന്നുണ്ട്. എന്തായാലും അംബാനിയുടെ വീട്ടിലെ ബോംബ് ഭീഷണി ശിവസേന, കോണ്ഗ്രസ്, എന്സിപി നേതൃത്വത്തിലുള്ള സര്ക്കാരിനെ വലിയ സമ്മര്ദ്ദത്തിലാഴ്ത്തിയിരിക്കുകയാണ്. കേസ് കൈകാര്യം ചെയ്യുന്നതിലെ പിഴവുകള് ചൂണ്ടിക്കാണിച്ച് ബിജെപി നേതാവും മുന്മുഖ്യമന്ത്രിയുമായ ദേവേന്ദ്ര ഫഡ്നാവിസ് മഹാരാഷ്ട്ര സര്ക്കാരിനെ പ്രതിക്കൂട്ടിലാക്കുകയാണ്.
മുകേഷ് അംബാനിയുടെ വീടിന് മുന്പില് നിന്നും കണ്ടെത്തിയ എസ് യുവിയില് 20 ജെലാറ്റിന് സ്റ്റിക്കുകളും കൈപ്പടയില് എഴുതിയ ഒരു കത്തും ഉണ്ടായിരുന്നു. ഇത് വരാനിരിക്കുന്നതിന്റെ വെറും ഒരു ട്രെയ്ലര് മാത്രമാണെന്നായിരുന്നു കത്തിലെ ഭീഷണി. മുഴുവന് കുടുംബാംഗങ്ങളെയും വധിക്കാന് കൂടുതല് തയ്യാറെടുപ്പുകളോടെ തിരിച്ചെത്തുമെന്നും കത്തില് ഭീഷണിയുണ്ട്. ഈ പച്ച എസ് യുവി മന്സുഖ് ഹിരന്റേതാണെന്ന് പിന്നീട് തിരിച്ചറിഞ്ഞു. അഞ്ച് മണിക്കൂര് ഒളിവിലായിരുന്ന മന്സുഖ് ഹിരനെ പിന്നീട് മാര്ച്ച് 5ന് മരിച്ച നിലയില് കണ്ടെത്തി. ഹിരെന് മുംബൈ പൊലീസിന് നല്കിയ കത്തില് വിശദാംശങ്ങള് നല്കിയിട്ടുണ്ട്. ഒരു വര്ഷമായി ഉപയോഗിക്കാതിരുന്ന കാര് കഴിഞ്ഞ ദിവസം വില്ക്കാന് വേണ്ടിയാണ് പുറത്തെടുത്തതെന്നും പോകുന്നവഴിയില് കാര് ബ്രേക്ക് ഡൗണായതിനെ തുടര്ന്ന് മുലുന്ദ് എയ്റോളി ലിങ്ക് റോഡില് പാര്ക്ക് ചെയ്തു. പിറ്റേ ദിവസം വാഹനം അപ്രത്യക്ഷമായി.
ഈ കാര് ഫിബ്രവരി 18ന് ആരോ മോഷ്ടിച്ചു. ഇതിലാണ് ജെലാറ്റിന് സ്റ്റിക്കുകള് നിറച്ച് മുകേഷ് അംബാനിയുടെ വീടിന് മുന്നില് കാര് അക്രമികള് കൊണ്ട് ഇട്ടത്. എന്നാല് ശിവ്സേന നേതാവ് ധനഞ്ജയ് ഗൗഡയുടെ ഓഫീസ് പരിസരത്താണ് മന്സുഖ് ഹിരന്റെ മൊബൈല് ലൊക്കേഷന് അവസാനം ഉണ്ടായിരുന്നതെന്നത് സംശയാസ്പദമാണെന്നും ഫഡ്നാവിസ് ആരോപിക്കുന്നു. പൊലീസ് ഉദ്യോഗസ്ഥന് സച്ചിന് വാസെയും ധനഞ്ജയ് ഗൗഡയും സുഹൃത്തുക്കളാണെന്നും 2017ലെ ബലംപ്രയോഗിച്ച് സ്വത്ത് തട്ടിയ കേസില് ഇരുവരും കൂട്ടുപ്രതികളാണെന്നും ഫഡ്നാവിസ് പറയുന്നു.
