തിരുവനന്തപുരം: ഐ ഫോണ് വിവാദം സിപിഎമ്മിനെ പ്രതിസന്ധിയിലാക്കിയതു കൂടാതെ ഇതേവിഷയത്തില് ട്രോളുകള് നേരിടുകയാണ് സന്ദീപാനന്ദഗിരി. ഡോളര് കടത്തുകേസിലെ പ്രതി സന്തോഷ് ഈപ്പന് സമ്മാനിച്ച ഫോണ് സ്വപ്ന സുരേഷ് നല്കിയത് കോടിയേരി ബാലകൃഷ്ണന്റെ ഭാര്യ വിനോദിനിക്കാണെന്ന കസ്റ്റംസ് റിപ്പോര്ട്ട് പുറത്തുവന്നതോടെ സന്ദീപാനന്ദഗിരിയുടെ പഴയ പോസ്റ്റ് കുത്തിപ്പൊക്കിയിരിക്കുയാണ് സോഷ്യല്മീഡിയ.
ഐ ഫോണ് വിവാദവുമായി ബന്ധപ്പെട്ട് കഴിഞ്ഞ ഒക്ടോബറില് സന്ദീപാനന്ദഗിരി ഫേസ്ബുക്കില് പങ്കുവെച്ച പോസ്റ്റ് ഇങ്ങനെ: ‘നമ്മള് ജീവിക്കുന്നത് ശാസ്ത്ര സാങ്കേതിക വിദ്യ വികാസം പ്രാപിച്ചിട്ടുള്ള കാലത്താണെന്ന് മറന്നു പോകരുത്! ഐഫോണ് വാങ്ങിയ ബില്ലില് ഫോണിന്റെ ബാച്ച് നമ്പര് ഉണ്ടാകും. അതുവഴി ഫോണ് ഇപ്പോള് എവിടെയാണ് ആരുടെ കയ്യിലാണെന്ന് അറിയാന് കേവലം നിമിഷങ്ങള് മാത്രം മതി. ജാഗ്രതൈ.’
ഇതോടെ, പരിഹാസ കമന്റുകള് കൊണ്ട് നിറയുകയാണ് കമന്റ് ബോക്സ്. നന്ദി ഷിബു. താങ്കളുടെ ഐഡിയ മൂലം സാധനം കിട്ടി കേട്ടോ! നിന്റെ നേതാവിന്റെ പെണ്ണുമ്പിള്ളയുടെ ബാഗില് ഉണ്ട് എന്നതടക്കം കമന്റുകളാണ് പ്രവഹിക്കുന്നത്. മാത്രമല്ല, കോണ്ഗ്രസ് യുവ എംഎല്എമാര് എല്ലാം സന്ദീപാനന്ദഗിരിയെ പരിഹസിച്ച് രംഗത്തെത്തി.
പ്രതിപക്ഷ നേതാവ് രമേശ് ചെന്നിത്തലക്ക് നല്കാനായി സ്വപ്ന സുരേഷ് തന്റെ പക്കല്നിന്ന് ഐഫോണുകള് വാങ്ങിയെന്ന് സന്തോഷ് ഈപ്പന് ഹൈക്കോടതിയില് വ്യക്തമാക്കിയപ്പോള് ചെന്നിത്തലയെ ട്രോളി സ്വാമി സന്ദീപാനന്ദഗിരി രംഗത്തെത്തിയിരുന്നു.അന്നിട്ട പോസ്റ്റാണ് ഇപ്പോള് സന്ദീപാനന്ദഗിരിക്ക് തിരിച്ചടിയായി മാറിയത്.
