പുതുച്ചേരി : ഭിന്നിപ്പിച്ചും കളവ് പറഞ്ഞും ഭരിക്കുക എന്നതാണ് കോണ്‍ഗ്രസിന്റെ നയം. നുണ പറച്ചിലില്‍ സ്വര്‍ണം, വെള്ളി, വെങ്കല മെഡലുകളെല്ലാം കോണ്‍ഗ്രസ്സിനാണെന്ന് പ്രധാനമന്ത്രി നരേന്ദ്രമോദി. കോണ്‍ഗ്രസ് നേതാവ് രാഹുല്‍ഗാന്ധിയുടെ പുതുച്ചേരി സന്ദര്‍ശനത്തെ ചൂണ്ടിക്കാട്ടിയാണ് മോദി ഇത്തരത്തില്‍ പ്രസ്താവന നടത്തിയത്.
പുതുച്ചേരിയിലെ ജനങ്ങള്‍ കോണ്‍ഗ്രസ് സര്‍ക്കാരിന്റെ പതനം ആഘോഷിക്കുകയാണ്. പുതുച്ചേരി സര്‍ക്കാരില്‍ നിന്ന് ഒരു സഹകരണവും ജനങ്ങള്‍ക്ക് ഉണ്ടായിട്ടില്ല. ഫണ്ടുകള്‍ വേണ്ടത്ര വിനിയോഗിച്ചില്ല. തീരദേശ, മത്സ്യത്തൊഴിലാളികളുടെ വികസനത്തിനായി സൃഷ്ടിച്ച പദ്ധതികള്‍ നടപ്പാക്കിയിട്ടില്ല. നുണകളെ അടിസ്ഥാനമാക്കിയുള്ള സംസ്‌കാരം പുലര്‍ത്തുന്ന ഒരു പാര്‍ട്ടിക്ക് എപ്പോഴെങ്കിലും ജനങ്ങളെ സേവിക്കാന്‍ കഴിയുമോ പുതുച്ചേരി സന്ദര്‍ശനത്തിനിടെ മോദി ചോദിച്ചു.
ഫിഷറീസ് മന്ത്രാലയം ഉണ്ടാക്കണമെന്ന രാഹുല്‍ ഗാന്ധിയുടെ പ്രസ്താവനയേയും അദ്ദേഹം പരിഹസിച്ചു. മത്സ്യ ബന്ധനത്തിനായി ഒരു മന്ത്രാലയം ഉണ്ടാക്കുമെന്നാണ് കോണ്‍ഗ്രസ് നേതാവിന്റെ പ്രസ്താവന. ഇത് തന്നെ ഞെട്ടിച്ചു, നിലവിലെ സര്‍ക്കാര്‍ 2019ല്‍ തന്നെ മന്ത്രാലയം രൂപീകരിച്ചിട്ടുള്ളതാണെന്നും അദ്ദേഹം അറിയിച്ചു.
ദിവസങ്ങള്‍ക്ക് മുമ്പ് രാജ്യം മുഴുവന്‍ ഒരു വീഡിയോ കണ്ടു. നിസഹായ ആയ ഒരു സ്ത്രീ ചുഴലിക്കാറ്റിലും വെള്ളപ്പൊക്കത്തിലും പുതുച്ചേരി സര്‍ക്കാരും മുഖ്യമന്ത്രിയും അവഗണിച്ചതായി പരാതിപ്പെടുകയുണ്ടായി. അവശ്യ സമയത്ത് ആരും തങ്ങള്‍ക്ക് യാതൊരു പിന്തുണയും നല്‍കിയില്ല. മുഖ്യമന്ത്രി നാരായണസ്വാമി പോലും ചുഴലിക്കാറ്റ് സമയത്ത് തങ്ങളെ സന്ദര്‍ശിച്ചിട്ടുണ്ടോയെന്നും സ്ത്രീ ചോദിച്ചു.
ഇത് സത്യസന്ധമായി വിവര്‍ത്തം ചെയ്യുന്നതിന് പകരം സ്ത്രീയുടെ വാക്കുകളെ മുഖ്യമന്ത്രി തെറ്റായി നല്‍കുകയായികുന്നു. മത്സ്യത്തൊഴിലാളികളുമായി രാഹുല്‍ സംവദിക്കവെയാണ് സ്ത്രീ സംസ്ഥാന സര്‍ക്കാരിനെ കുറിച്ച് പരാതിപ്പെട്ടത്. നിവാര്‍ ചുഴലിക്കാറ്റിന്റെ സമയത്ത് താന്‍ അവരുടെ പ്രദേശം സന്ദര്‍ശിച്ച് ആശ്വാസം നല്‍കിയെന്നാണ് അവര്‍ പറഞ്ഞെന്നാണ് നാരായണസ്വാമി സ്ത്രീയുടെ പരാതിയെ രാഹുലിന് വിവര്‍ത്തനം ചെയ്ത് നല്‍കിയത്.
