തിരുവനന്തപുരം : കേന്ദ്രസമിതിയുടെ നിര്ദ്ദേശത്തിന്റെ അടിസ്ഥാനത്തില് സംസ്ഥാനത്തെ കോറോണ വാക്സിനേഷന് വേഗത്തിലാക്കാന് മന്ത്രി കെ.കെ. ശൈലജ നിര്ദ്ദേശം നല്കി. രാജ്യത്തെ കോവിഡ് രോഗികളില് നല്ലൊരു വിഭാഗം കേരളത്തിലേതാണ്. ഇതിനെ തുടര്ന്ന് കേന്ദ്ര വിദഗ്ധ സമിതി സംസ്ഥാനത്ത് എത്തുകയും കടുത്ത നിയന്ത്രണങ്ങള് ഏര്പ്പെടുത്താന് ഉള്പ്പടെ നിര്ദ്ദേശങ്ങള് നല്കുകയും ചെയ്തിരുന്നു.
ഇതിന്റെ അടിസ്ഥാനത്തിലാണ് കേരളത്തില് മന്ദഗതിയിലായിരുന്ന കോവിഡ് വാക്സിനേഷന് വേഗത്തിലാക്കാന് മന്ത്രി കെ.കെ. ശൈലജ നിര്ദ്ദേശം നല്കി. രണ്ടാംഘട്ട കോവിഡ് വാക്സിനേഷന് തുടങ്ങേണ്ട സമയം കൂടി അടുത്തിരിക്കുകയാണ്. ഇതുകൂടി കണക്കിലെടുത്ത് പ്രതിരോധ പ്രവര്ത്തനങ്ങള് വേഗത്തിലാക്കാനും ആരോഗ്യ മന്ത്രി നിര്ദ്ദേശം നല്കി.
വാക്സിന് സ്വീകരിക്കുന്നതിനായി കോവിന് ആപ്പില് രജിസ്റ്റര് ചെയ്തിട്ടുള്ളവര് വാക്സിനെടുക്കുന്നതിനുള്ള തീയതി, സ്ഥലം എന്നിവയടങ്ങുന്ന മൊബൈല് സന്ദേശത്തിനനുസരിച്ച് വാക്സിനേഷന് കേന്ദ്രത്തില് എത്തിച്ചേരേണ്ടതാണെന്ന് ആരോഗ്യമന്ത്രി അറിയിച്ചു. ചിലര് അന്നേദിവസം എത്താത്തതു കാരണം മറ്റുള്ള ആരോഗ്യ പ്രവര്ത്തകരുടെ അവസരം കൂടി നഷ്ടമാകുന്നതായി കണ്ടെത്തിയിട്ടുണ്ട്. അന്നേ ദിവസം കുത്തിവയ്പ്പ് എടുക്കുന്നതിന് ഏതെങ്കിലും വിധത്തിലുള്ള അസൗകര്യമുണ്ടെങ്കില് ആ വിവരം വാക്സിനേഷന് കേന്ദ്രത്തില് മുന്കൂട്ടി അറിയിക്കേണ്ടതാണ്.
ആദ്യഘട്ടത്തില് സര്ക്കാര് സ്വകാര്യ മേഖലയിലെ ആരോഗ്യ പ്രവര്ത്തകര്, ആശ, അങ്കണവാടി പ്രവര്ത്തകര് എന്നിവരടക്കം മുഴുവന് ആരോഗ്യ പ്രവര്ത്തകര്ക്കാണ് പ്രതിരോധ കുത്തിവെയ്പ്പ് നല്കുന്നത്. രണ്ടാംഘട്ട വാക്സിനേഷന് ആരംഭിക്കുന്നതിന് മുന്നോടിയായി ആരോഗ്യ പ്രവര്ത്തകര് എല്ലാവരും വാക്സിന് എടുക്കണം. വാക്സിന് ലഭിക്കുവാനുള്ള അവസരം വൈകുന്നതിനുള്ള സാധ്യത ഒഴിവാക്കുവാനായി മൊബൈലില് സന്ദേശം ലഭിച്ച ദിവസം തന്നെ വാക്സിന് കേന്ദ്രത്തില് എത്തണമെന്നും മന്ത്രി അഭ്യര്ത്ഥിച്ചു.
