കൊട്ടാരക്കര: പുത്തൂര് എസ്എന് പുരം കോലിയക്കോട് കുടിവെള്ള സംഭരണി തകര്ച്ചയില്. സംഭരണി ഏതു നിമിഷവും നിലംപൊത്താവുന്ന അവസ്ഥലയിലെത്തിയതോടെ ഭീതിയിലാണ് ഗ്രാമവാസികള്.
1984ല് ആണ് ഈ കൂറ്റന് സംഭരണി സ്ഥാപിച്ചത്. പത്ത് വര്ഷമായി ജലവിതരണം മുടങ്ങി ഉപയോഗശൂന്യമായി കിടക്കുന്നു. പൊരീക്കലില് വലിയ സംഭരണി സ്ഥാപിച്ചതോടെയാണ് കോലിയക്കോട് ജലസംഭരണി നോക്കുകുത്തിയായത്. ജലസംഭരണിയുടെ തൂണുകള് പലതും ഇളകിയ നിലയിലാണ്.
കോണ്ക്രീറ്റ് ബീമിന്റെ ഭാഗങ്ങള് പൊട്ടിയിട്ടുണ്ട്. സമീപമുള്ള വീടിന്റെ മുകളിലേക്ക് കോണ്ക്രീറ്റ് ഭാഗങ്ങള് പലതവണ അടര്ന്ന് വീണിട്ടുണ്ട്. സംഭരണി ഒരു ഭാഗത്തേക്ക് ചരിഞ്ഞിരിക്കുകയാണെന്നും നാട്ടുകാര് പറയുന്നു. ജലസംഭരണി നില്ക്കുന്ന സ്ഥലമാകെ കാടുകയറി ഇഴ ജന്തുകളുടെ താവളമായി മാറി. നിരവധി വീടുകള് ഈ സംഭരണിയുടെ പരിസര പ്രദേശത്തുണ്ട്.
അപകടാവസ്ഥയിലായ ജലസംഭരണി നീക്കം ചെയ്യാനോ കേടുപാടുകള് മാറ്റി പുതുക്കി നിര്മ്മിക്കാനോ അധികൃതര് തയ്യാറാകുന്നില്ലെന്നാണ് നാട്ടുകാരുടെ ആക്ഷേപം. പുത്തൂരില് ജലസംഭരണി തകര്ന്നുവീണ് വീട്ടില് ഭക്ഷണം കഴിച്ചുകൊണ്ടിരുന്ന കുഞ്ഞ് മരിച്ചതിന്റെ ഓര്മ്മകള്ക്ക് അധികം പഴക്കം വന്നിട്ടില്ല. ഇവിടെയും ദുരന്തം ആവര്ത്തിക്കും മുന്പ് അധികൃതര് ഇടപെടണമെന്നാണ് ആവശ്യം.
