ആരാധകര് ഏറെ ആവേശത്തോടെയാണ് കെജിഎഫ് ചാപ്റ്റര് രണ്ടാംഭാഗത്തിന്റെ ടീസര് വരവേറ്റത്. പുറത്തിറങ്ങി മണിക്കൂറുകള്ക്കുള്ളില് തന്നെ ലക്ഷക്കണക്കിന് ആളുകളാണ് ഇത് കണ്ടത്. എന്നാല് ദിവസങ്ങള്ക്കുള്ളില് തന്നെ പുകവലി പ്രോത്സാഹിപ്പിച്ചെന്ന് ആരോപിച്ച് സിനിമയ്ക്കെതിരെ വിവാദവും ഉയര്ന്നിട്ടുണ്ട്.
ടീസറിലൂടെ പുകവലി പ്രോത്സാഹിപ്പിച്ചു എന്ന് ചൂണ്ടിക്കാട്ടി ആന്റി ടുബാക്കോ സെല്ലാണ് രംഗത്ത് എത്തിയിരിക്കുന്നത്. നടന് യഷിന് സെല് നോട്ടീസും നല്കിയിട്ടുണ്ട്. നിരവധി ആരാധകരുള്ള ഒരു നടന് മാസ് രംഗങ്ങള്ക്കായി പുകവലിക്കുന്നത് അതിനെ പ്രോത്സാഹിപ്പിക്കുന്നതാണ്. സിഗററ്റ് ആന്ഡ് അദര് ടൊബാക്കോ ആക്ട് സെക്ഷന് 5ന്റെ ലംഘനമാണിതെന്നും നോ്ട്ടീസില് ചൂണ്ടിക്കാട്ടുന്നുണ്ട്.
ഇതിനെ തുടര്ന്ന് സമൂഹമാധ്യമങ്ങളില് നിന്ന് ടീസറും പോസ്റ്ററുകളും നീക്കം ചെയ്യണം. പുകവലിക്കുന്ന ദൃശ്യങ്ങള് പുറത്തുവിടുമ്പോള് എഴുതി കാണിക്കേണ്ട മുന്നറിയിപ്പ് ഇതില് കാണിച്ചിട്ടില്ല. ഒരുപാട് ആരാധകരുള്ള നിങ്ങളുടെ ചെയ്തികള് യുവാക്കളെ വഴിതെറ്റിക്കരുത്. പുകവലിക്കെതിരായ പ്രചാരണത്തില് താങ്കള് പങ്കാളിയാവണമെന്നാണ് ആഗ്രഹിക്കുന്നതെന്നും നോട്ടീസില് പറയുന്നുണ്ട്.
കെജിഎഫ് ഒന്നാം ഭാഗം തെന്നിന്ത്യയില് വന്ഹിറ്റായിരുന്നു. അതുകൊണ്ടു തന്നെ രണ്ടാംഭാഗത്തിനായി ജനങ്ങള് ഏറെ പ്രതീക്ഷയോടെയാണ് കാത്തിരിക്കുന്നത്. പ്രശാന്ത് നീല് സംവിധാനം ചെയ്ത ചിത്രത്തില് യഷ് ആണ് കേന്ദ്ര കഥാപാത്രം. കന്നഡ ചിത്രത്തില് നിര്മിക്കുന്ന സിനിമ ഹിന്ദി, മലയാളം, തമിഴ്, തെലുങ്ക് ഭാഷകളിലേക്കും മൊഴി മാറ്റം ചെയ്യും. ബോളിവുഡ് താരം സഞ്ജയ് ദത്താണ് ചിത്രത്തില് വില്ലന് വേഷമായ അധീരയെ അവതരിപ്പിക്കുന്നത്. ശ്രീനിധി ഷെട്ടിയാണ് നായിക. ചിത്രത്തില് ആനന്ത് നാഗ്, മാളവിക അവിനാശ്, പ്രകാശ് രാജ്, രവീണ ടാന്ഡന് എന്നിവരും വേഷമിടുന്നുണ്ട്.
