കൊട്ടരക്കര ശ്രീധരന്‍ നായരുടെ ഇളയ മകള്‍ ശൈലജയും സുരാജ് വെഞ്ഞാറമൂടിന്റെ സഹോദരന്‍ സജി വെഞ്ഞാറമൂടും അഭിനയ രംഗത്തേയ്‌ക്കുള്ള ചുവടുമാറ്റത്തില്‍. ജോജു ജോര്‍ജ് കേന്ദ്ര കഥാപാത്രമാകുന്ന ‘താത്വിക അവലോകനം’ എന്ന പുതിയ ചിത്രത്തിലൂടെയാണ് ഇരുവരും സിനിമയിലേക്ക് എത്തുന്നത്.
ജോജുവിനെ കൂടാതെ അജു വര്‍ഗീസ്, നിരഞ്ജന്‍ രാജു എന്നിവരെ പ്രധാന കഥാപാത്രങ്ങളാക്കി അഖില്‍ മാരാര്‍ തിരക്കഥയെഴുതി സംവിധാനം ചെയ്യുന്ന ഈ ചിത്രത്തില്‍ വിഷ്ണു നാരായണനാണ് ഛായാഗ്രാഹണം. യോഹന്‍ പ്രൊഡക്ഷന്‍സിന്റെ ബാനറില്‍ ഡോ. ഗീ വര്‍ഗ്ഗീസ് യോഹന്നാനാണ് ചിത്രം നിര്‍മിക്കുന്നത്. ഷമ്മി തിലകന്‍, സലിം കുമാര്‍, കൃഷ്ണ കുമാര്‍, ജയകൃഷ്ണന്‍, മേജര്‍ രവി, ശ്രീജിത് രവി, മാമുക്കോയ, പ്രശാന്ത് അലക്‌സ്, മനു രാജ് തുടങ്ങിയവരും ചിത്രത്തില്‍ അഭിനയിക്കുന്നുണ്ട്.
പുതുവര്‍ഷ ആരംഭത്തില്‍ തന്നെ ആക്ഷേപ ഹാസ്യമായി ഒരുക്കുന്ന താത്വിക അവലോകനത്തിന്റെ ചിത്രീകരണം ആരംഭിക്കും. പ്രൊഡക്ഷന്‍ കണ്‍ട്രോളര്‍ എസ്സാ കെ എസ്തപ്പാന്‍, കല- ശ്യാം കാര്‍ത്തികേയന്‍, മേക്കപ്പ്- ജിത്തു പയ്യന്നൂര്‍, വസ്ത്രാലങ്കാരം- അരവിന്ദന്‍, സ്റ്റില്‍സ്- സേതു, അസോസിയേറ്റ് ഡയറക്ടര്‍- ബോസ്.
