തിരുവനന്തപുരം: സമൂഹ മാധ്യമങ്ങളില് ഏറെ പ്രചരിച്ച വീഡിയോയില് കുട്ടികളെ മര്ദ്ദിക്കുന്ന ആള് അറസ്റ്റില്. ഈ സംഭവത്തെക്കുറിച്ചു അന്വേഷിക്കണമെന്ന ആവശ്യവുമായി ധാരാളം പേര് പ്രസ്തുത വീഡിയോ പോലീസിനു അയച്ചുകൊടുത്തിരുന്നു. അതേത്തുടര്ന്ന് പ്രതിയെ കണ്ടെത്തുന്നതിനായി കേരള പോലീസിന്റെ ഔദ്യോഗിക ഫെയ്സ്ബുക്ക് പേജില് ഈ വീഡിയോ പോസ്റ്റ് ചെയ്തിരുന്നു.
ദൃശ്യങ്ങളിലുള്ള ആളിനെക്കുറിച്ചു ചിലര് നല്കിയ സൂചനകളില് നിന്നും ഇയാള് ആറ്റിങ്ങല് സ്വദേശിയായ സുനില്കുമാര് (45) ആണെന്ന് സോഷ്യല് മീഡിയ സെല്ലിന് വിവരം ലഭിക്കുകയായിരുന്നു. തുടര്ന്ന് ആറ്റിങ്ങല് ഡിവൈഎസ്പിക്കും ആറ്റിങ്ങല് സ്റ്റേഷന് ഹൗസ് ഓഫീസര്ക്കും സോഷ്യല് മീഡിയ സെല് വിവരം കൈമാറുകയായിരുന്നു. ആറ്റിങ്ങല് പോലീസ് ജുവനൈല് ജസ്റ്റിസ് ആക്ട് പ്രകാരം ഇയാള്ക്കെതിരെ കേസെടുക്കുകയും അറസ്റ്റ് ചെയ്യുകയുമായിരുന്നു.
