ചേര്ത്തല: സിഗ്നല് സംവിധാനവും നീരീക്ഷണ ക്യാമറയുമില്ല. ദേശീപാതയിലെ ഒറ്റപ്പുന്ന കവലയില് അപകടം പതിവായി. ജീവഭയത്തോടെ യാത്രക്കാര്.
ദേശീയപാതയിലെ നഗരത്തിന്റെ പ്രവേശന കവാടമായ ഇവിടെ ഇന്നലെ മരിച്ചത് റിട്ട. കെഎസ്ആര്ടി ചെക്കിങ് ഇന്സ്പെക്ടര്. കടക്കരപ്പള്ളി നടുവിലേപ്പറമ്പില് കെ. ജയറാം (73) ആണ് മരിച്ചത്. ഇന്നലെ രാവിലെ ജയറാം സഞ്ചരിച്ച സ്കൂട്ടറില് കാറിടിച്ചായിരുന്നു അപകടം. കവലയില് അപകടങ്ങള് പതിവായിട്ടും അധികൃതര് മൗനം പാലിക്കുന്നതായാണ് വിമര്ശനം ഉയരുന്നത്. അമിത വേഗതയും ഓവര്ടേക്കിങ്ങുമാണ് അപകടങ്ങള് വര്ധിക്കുന്നതിന് കാരണമാകുന്നത്. പോലീസിന്റെയും മോട്ടോര് വാഹന വകുപ്പിന്റെയും പരിശോധന കുറഞ്ഞതും ഗതാഗത തിരക്കില്ലാത്തതും മൂലം വാഹനങ്ങള് ദേശീയപാതയിലൂടെ ചീറിപ്പായുകയാണ്. വടക്ക്, തെക്ക് ദിക്കുകളില് നിന്ന് വരുന്ന വാഹനങ്ങളുടെ വേഗതയറിയാതെ നഗരത്തിലേക്ക് വരുന്നവരും മടങ്ങി പോകുന്നവരും ദേശീയപാത കടക്കാന് ശ്രമിക്കുന്നതാണ് അപകടങ്ങള് തുടര്ക്കഥയാകുന്നതിന് കാരണം. ഗതാഗത തിരക്ക് കുറഞ്ഞ ഭാഗങ്ങളില് പോലും നിരീക്ഷണ ക്യാമറ സ്ഥാപിക്കുന്ന അധികാരികള് കവലയെ അവഗണിക്കുന്നതാണ് അപകടങ്ങള് വര്ധിക്കുന്നതിന് കാരണമെന്നാണ് പ്രദേശവാസികള് പറഞ്ഞു.
സിഗ്നല് സംവിധാനമില്ലാത്തതിനാല് റോഡിന്റെ ഇരുഭാഗങ്ങളിലും കഴിയുന്നവര്ക്ക് മറുഭാഗത്ത് എത്താന് ഏറെ നേരം കാത്ത് നില്ക്കേണ്ട സ്ഥിതിയാണ്. തങ്കി, കണ്ടമംഗലം ഭാഗങ്ങളിലേക്ക് വേഗത്തിലെത്താവുന്ന ഇടറോഡ് ദേശീയപാതയുടെ പടിഞ്ഞാറ് ഭാഗത്ത് നിന്ന് ആരംഭിക്കുന്നതിനാല് ഗതാഗത തിരക്ക് ഏറെയാണ്. ദേശീയപാതയിലെ മാതൃക സുരക്ഷ പാത ആരംഭിക്കുന്ന കവല വരെയാണ് രണ്ട് വരിപാത നിര്മിച്ചിട്ടുള്ളത്.
വടക്ക് ഭാഗത്ത് നിന്ന് എത്തുന്ന വാഹനങ്ങള് കവലയില് ഇരട്ട വരി അവസാനിച്ച് ഒറ്റവരിയാകുന്നത് തിരിച്ചറിയാതെ പാഞ്ഞ് വരുന്നതും അപകടങ്ങള്ക്ക് കാരണമാകുന്നുണ്ട്. അപകടം പതിവായ സാഹചര്യത്തില് സിഗ്നല് സംവിധാനം ഒരുക്കിയും പോലീസും മോര്ട്ടോര് വാഹന വകുപ്പും പരിശോധന കര്ശനമാക്കിയും മേഖല അപകട രഹിതമാക്കാന് അടിയന്തര നടപടി സ്വീകരിക്കണമെന്നാണ് നാട്ടുകാരുടെ ആവശ്യം.
