പത്തനാപുരം: സിപിഎം സ്ഥാനാര്ഥിയോടൊപ്പം തെരഞ്ഞെടുപ്പ് പ്രചാരണത്തിന് പോയ വനിതാസഖാവിനെ ബ്രാഞ്ച് കമ്മറ്റിയംഗം പീഡിപ്പിക്കാന് ശ്രമിച്ചു. തലവൂര് പഞ്ചായത്തിലെ അരിങ്ങട വാര്ഡിലായിരുന്നു ഗുരുതര സംഭവങ്ങള് അരങ്ങേറിയത്.
ഭവന സന്ദര്ശനത്തിനിടെ വനിതാപ്രവര്ത്തകയുടെ ശരീരത്തില് ബോധപൂര്വം ബ്രാഞ്ച് കമ്മറ്റിയംഗം പിടിക്കുകയായിരുന്നു. സംഭവം നാട്ടിലാകെ ചര്ച്ചയായതോടെ ഒത്തുതീര്പ്പുമായി സ്ഥാനാര്ഥിയും സിപിഎം പ്രവര്ത്തകരും വനിതാപ്രവര്ത്തകയുടെ വീട്ടിലെത്തി. മാപ്പാക്കണമെന്ന് സ്ഥാനാര്ഥിയും പീഡിപ്പിക്കാന് ശ്രമിച്ച ബ്രാഞ്ച് കമ്മറ്റിയംഗവും അപേക്ഷിച്ചു. ചെയ്തത് തെറ്റാണന്ന കുറ്റസമ്മതം നടത്തിയ ഇവര് പോലീസില് പരാതി നല്കാതിരിക്കാന് വലിയ ഇടപെടലും നടത്തി.
എന്നാല് തന്നെ അപമാനിക്കാന് ശ്രമിച്ച ബ്രാഞ്ച് നേതാവിനെ കണ്ട് നിയന്ത്രണംവിട്ട യുവതി ചെകിട്ടത്ത് നാല് കൊടുക്കാനും മറന്നില്ല. സംഭവത്തിന്റെ ദ്യശ്യങ്ങള് കൂട്ടത്തിലാരോ പകര്ത്തി സാമൂഹമാധ്യമങ്ങളില് പ്രചരിപ്പിച്ചതോടെ തലവൂരിലെ സിപിഎം നേത്യത്വം വെട്ടിലായി. നാണക്കേട് മൂലം നേതാക്കള് പുറത്തിറങ്ങാതിരിക്കുകയാണ്.
അതേസമയം ബ്രാഞ്ച് കമ്മറ്റിയംഗത്തിനെതിരെ നടപടിയെടുക്കാന് സിപിഎം നേതൃത്വം ഇതുവരെയും തയ്യാറായിട്ടില്ല.
