തൃശൂര്‍: കോര്‍പ്പറേഷന്‍ 12-ാം ഡിവിഷന്‍ ചെമ്പൂക്കാവില്‍ മൂന്ന് മുന്നണികളും തമ്മില്‍ നടക്കുന്നത് കടുത്ത പോരാട്ടം. ത്രികോണ മത്സരത്തില്‍ ഏറ്റുമുട്ടുന്ന വനിതാ സ്ഥാനാര്‍ത്ഥികളാകട്ടെ തെരഞ്ഞെടുപ്പ് ചൂടിനിടയിലും കടുത്ത സൗഹൃദത്തിലും. തെരഞ്ഞെടുപ്പ് പ്രചരണവേളയില്‍ ഡിവിഷനിലെ പലസ്ഥലങ്ങളിലും വീടുകളിലും വെച്ച് ഇവര്‍ നേരില്‍ കാണാറുണ്ടായിരുന്നു.
തിരക്കിനിടയിലും അപ്പോഴെല്ലാം മത്സരബുദ്ധി മറന്ന് ഇവര്‍ കുശലാന്വേഷണം നടത്താറുണ്ട്. ഈ സൗഹൃദം വോട്ടെടുപ്പ് ദിനത്തിലും മൂവരും പുലര്‍ത്തുകയായിരുന്നു. ബിജെപി സ്ഥാനാര്‍ത്ഥി ലക്ഷ്മി അരുണ്‍, യുഡിഎഫ് സ്ഥാനാര്‍ത്ഥി റെജി ജോയ്, എല്‍ഡിഎഫിലെ സനിറ്റ ആന്റണി ചിറയത്ത് എന്നിവര്‍ പോളിങ് ബൂത്തിലെത്തുന്ന വോട്ടര്‍മാരെ രാവിലെ മുതല്‍ സ്വീകരിച്ചിരുന്നത് ഒരുമിച്ച്.
ചെമ്പൂക്കാവ് ഹോളി ഫാമിലി സ്‌കൂളിലെ ബൂത്തിലേക്ക് വോട്ട് ചെയ്യാനെത്തുന്നവരെ ഗേറ്റിനു മുന്നില്‍ ഒരുമിച്ച് നിന്നാണ് മൂവരും വരവേറ്റത്. വീട്ടിലേക്കെത്തുന്ന അതിഥികളെയെന്ന പോലെ രാഷ്‌ട്രീയ വൈരാഗ്യം മറന്ന് പുഞ്ചിരിയോടെയുള്ള സ്ഥാനാര്‍ത്ഥികളുടെ സ്വീകരണം വോട്ടര്‍മാര്‍ക്ക് ഏറെ കൗതുക കാഴ്ചയായി.
