തിരുവനന്തപുരം: പ്രതിപക്ഷ നേതാവ് രമേശ് ചെന്നിത്തലയുടെ ആരോപണങ്ങള് നിര്ഭാഗ്യകരമെന്ന് സ്പീക്കര് പി ശ്രീരാമകൃഷ്ണന്. സ്വര്ക്കടത്ത് കേസ് പ്രതി സ്വപ്ന സുരേഷിനെ പരിചയമുണ്ടെന്നും അറിയില്ലെന്ന് പറഞ്ഞിട്ടില്ലെന്നും പറഞ്ഞ അദ്ദേഹം തനിക്കെതിരെ ഉയര്ന്ന ആരോപണങ്ങളെല്ലാം നിഷേധിച്ചു. പ്രതിപക്ഷനേതാവ് രമേശ് ചെന്നത്തിലയുടെ വാര്ത്താ സമ്മേളനത്തിന് പിന്നാലെയാണ് വിശദീകരണവുമായി അദ്ദേഹം രംഗത്തെത്തിയത്.
സ്വപ്നയുടെ ക്രിമിനല് പശ്ചാത്തലത്തെക്കുറിച്ച് അറിവുണ്ടായിരുന്നില്ല. സ്വര്ണക്കടത്ത് കേസ് പ്രതികള്ക്ക് ഒരു സഹായവും ചെയ്തിട്ടില്ല. തന്റെ വിദേശയാത്രകളില് ഒരിക്കല് പോലും സ്വപ്ന ഒപ്പമുണ്ടായിരുന്നില്ല. വിദേശത്തുവച്ചു സ്വപ്നയുമായി കൂടിക്കാഴ്ച നടത്തിയിട്ടില്ലെന്നും സ്പീക്കര് വ്യക്തമാക്കി.
ഊഹാപോഹങ്ങള്കൊണ്ട് ഭരണഘടനാസ്ഥാപനങ്ങളെ ആക്രമിക്കുന്നത് ജനനാധിപത്യത്തിന് ഭൂഷണമല്ല. എന്നാല് വിമര്ശനത്തിന് വിധേയനാകാത്ത വിശുദ്ധ പശുവല്ല സ്പീക്കര്. സംസ്ഥാന നിയമസഭയുടെ പ്രവര്ത്തനങ്ങള്ക്ക് ദേശീയ തലത്തില് അംഗീകാരം ലഭിച്ചിട്ടുണ്ട്. ഒളിവും മറവുംവച്ച് ഒരുപദ്ധതിയും നടപ്പാക്കിയിട്ടില്ലെന്നും സ്പീക്കര് കൂട്ടിച്ചേര്ത്തു.
കൂട്ടായ ആലോചന നടത്തിയ ശേഷമാണ് കടലാസ് രഹിത പദ്ധതി നടപ്പാക്കിയത്. ഇതിലൂടെ പ്രതിവര്ഷം 40 കോടി രൂപ സംസ്ഥാനത്തിന് ലാഭിക്കാനാകും. ലോക കേരളസഭയുടെ അന്തസ് ഉറപ്പാക്കുന്നതിന് വേണ്ടിയാണ് ശങ്കരനാരായണന് തമ്പി ഹാള് പുതുക്കി പണിതത്. 16.50 കോടി രൂപയുടെ ഭരണാനുമതി പദ്ധിക്കുണ്ടായിരുന്നു.
എന്നാല് 9.17 കോടി രൂപയ്ക്ക് പദ്ധതി പൂര്ത്തിയായി. ചട്ടങ്ങള് പാലിച്ചാണ് 30തമാനം തുക ഊരാളുങ്കലിന് മുന്കൂറായി കൈമാറിയത്. ഏത് പദ്ധതിയെപ്പറ്റിയും നിയമസഭാ സമിതികള്ക്ക് അന്വേഷിക്കാമെന്നും അദ്ദേഹം പറഞ്ഞു.
