വൃന്ദാവനവും ഗോപികമാരും പൈക്കിടാങ്ങളും നിറയുന്ന കൃഷ്ണലീലകഥകള് ഒരുപാടുണ്ട്. പേമാരിയായി പെയ്ത ഇന്ദ്രകോപത്തില് നിന്ന് ഗോവര്ധനമുയര്ത്തി വൃന്ദാവനവാസികളെ ഭഗവാന് രക്ഷിച്ചത് അതിലൊന്നാണ്. കണ്ണന് ഗിരിധാരിയെന്ന് പേരുകിട്ടിയ കഥ.
ഉത്തരേന്ത്യയില് ദീപാവലി ആഘോഷങ്ങളുടെ അഞ്ചാംനാള് നടക്കുന്ന ഗോവര്ധന പൂജയ്ക്ക് നിദാനമായ കഥയാണത്.
വൃന്ദാവനത്തിലെ ജനങ്ങള് എല്ലാവര്ഷവും ഇന്ദ്രനെ പ്രീതപ്പെടുത്താന് പൂജ നടത്താറുണ്ടായിരുന്നു. ഒരിക്കല് പൂജയ്ക്കൊരുങ്ങി നിന്ന വൃന്ദാവന വാസികളോട് ‘ഇന്ദ്രനെയല്ല, നിങ്ങള്ക്കു വേണ്ടതെല്ലാം തരുന്ന ഗോവര്ധന പര്വതത്തെയാണ് പൂജിക്കേണ്ടതെന്ന്’ കൃഷ്ണന് അവരെ ഉപദേശിച്ചു. കണ്ണന്റെ വാക്കുകള് അവര് തെല്ലും മടികൂടാതെ അനുസരിച്ചു.
ഇതറിഞ്ഞ് ഇന്ദ്രന് കോപാകുലനായി. ഇന്ദ്രകോപം പെരുമഴയായെത്തി. മഴയില്പ്പെട്ട മനുഷ്യരെ രക്ഷിക്കാന് കൃഷ്ണന് ഗോവര്ധമെടുത്ത് ഉയര്ത്തി. അതു കീഴെ അഭയം തേടി ജനങ്ങള് ഇന്ദ്രകോപത്തില് നിന്ന് രക്ഷപ്പെട്ടു.
ഏഴുനാള് ഭഗവാന് പര്വതം ഉയര്ത്തി നിന്നു. ഭഗവാന്റെ അത്ഭുതലീലകള് കണ്ട് ഇന്ദ്രന് ഭക്ത്യാദരങ്ങളോടെ പിന്മാറിയെന്ന് കഥ.
ഉത്തര്പ്രദേശിലെ വ്രജില് യമുനയുടെ തീരത്താണ് ഗോര്വര്ധന പര്വതം. ഉയരം ഏറെയില്ലാതെ, പരന്നു കിടക്കുന്ന ഗോവര്ധനത്തിന് 11 കിലോമീറ്റര് ചുറ്റളവുണ്ട്. ഗോര്വര്ധനത്തെ വലം വയ്ക്കുന്നത് (പരിക്രമ) പുണ്യമെന്നാണ് സങ്കല്പം.
ദീപാവലി ആഘോഷങ്ങളില് ഗോര്വധപൂജയ്ക്കും തനതായ പ്രാധാന്യമുണ്ട്. ചാണകം കൊണ്ട് ഗോവര്ധത്തിന്റെ രൂപമൊരുക്കിയാണ് പൂജയ്ക്ക് സജ്ജമാക്കുന്നത്. പശുക്കളുടെയും പുല്പ്പരവതാനികളുടെയും കുഞ്ഞു രൂപങ്ങളുണ്ടാക്കി അത് അലങ്കരിക്കുന്നു. 56 തരം വിഭവങ്ങളൊരുക്കി പ്രസാദമായി നല്കുന്ന ‘അന്നകൂട്’ ചടങ്ങും പൂജയുടെ ഭാഗമാണ്.
