തൃശ്ശൂര്: ചികിത്സാ പിഴവുമൂലം കളമശ്ശേരി മെഡിക്കല് കോളേജില് രോഗികള് മരിച്ച സംഭവത്തില് ആരോഗ്യ വകുപ്പിനെതിരെ ബിജെപി സംസ്ഥാന വക്താവ് അഡ്വ. ബി ഗോപാലകൃഷ്ണന്. കോവിഡ് മരണങ്ങളില് ദുരൂഹതയുണ്ട്. കേന്ദ്രമന്ത്രി ഹര്ഷ വര്ധനെ വിമര്ശിച്ച ആരോഗ്യ വകുപ്പിന് ഇതിനെ കുറിച്ച് എന്ത് പറയാനുണ്ടെന്ന് ഗോപാലകൃഷ്ണന് ആരാഞ്ഞു. സംഭവത്തിന്റെ ഉത്തരവാദിത്തം ആരോഗ്യമന്ത്രി കെ.കെ ശൈലജയ്ക്കാണെന്നും അദേഹം പറഞ്ഞു.
കോവിഡ് ബാധിതനായ ബൈഹക്കിന്റെ ടെലഫോണ് സന്ദേശം മരണ മൊഴിയായി എടുത്ത് ആരോഗ്യ വകുപ്പിനെതിരെ കൊലക്കുറ്റം ചുമത്തി കേസ്സ് എടുക്കണം. മെഡിക്കല് കോളേജില് പണം കൊടുത്താല് പഞ്ചനക്ഷത്ര ചികിത്സ കിട്ടുമെന്നും സഹോദരന് ഗസ്നിയോടുള്ള ബൈഹക്കിന്റെ ദയനീയ വാക്കുകള് കൊവിഡ് ചികിത്സയില് കഴിയുന്ന രോഗികളോട് കാട്ടുന്ന സാമ്പത്തിക വിവേചനത്തെ തുറന്നുകാട്ടുന്നുവെന്നും ഗോപാലകൃഷ്ണന് പറഞ്ഞു.
മരിച്ച രോഗികളുടെ ബന്ധുക്കളോട് ആരോഗ്യമന്ത്രി ശൈലജ മാപ്പ് പറയണം. കളമശ്ശേരി മെഡിക്കല് കോളേജില് കോവിഡ് രോഗവുമായി ബന്ധപ്പട്ട എല്ലാ മരണങ്ങളും അന്വേഷിക്കണമെന്നും ഗോപാലകൃഷ്ണന് ആവശ്യപ്പെട്ടു.
