കോഴിക്കോട്: ബിജെപി ദേശീയ വൈസ് പ്രസിഡന്റ് എ.പി. അബ്ദുള്ളക്കുട്ടിക്കുനേരെയുണ്ടായ ആക്രമണത്തില്‍ പ്രതിഷേധം ശക്തം. സംഭവത്തെക്കുറിച്ച് സമഗ്രമായ അന്വേഷണം നടത്തണമെന്ന് ആവശ്യപ്പെട്ട് ബിജെപിയും ന്യൂനപക്ഷമോര്‍ച്ചയും നഗരത്തില്‍ പ്രതിഷേധം സംഘടിപ്പിച്ചു.
ബിജെപിയുടെ നേതൃത്വത്തില്‍ സിറ്റി പോലീസ് കമ്മീഷണര്‍ ഓഫീസിന് മുന്നില്‍ നടത്തിയ പ്രതിഷേധം ബിജെപി സംസ്ഥാനസെക്രട്ടറി പി. രഘുനാഥ് ഉദ്ഘാടനം ചെയ്തു. സ്വര്‍ണ്ണക്കടത്ത് കേസില്‍ നിന്ന് ശ്രദ്ധതിരിക്കാനും പ്രകോപിപ്പിക്കാനുമാണ് അബ്ദുള്ളക്കുട്ടിയെ ആക്രമിച്ചതെന്ന് അദ്ദേഹം ആരോപിച്ചു. നേതാക്കളെ വ്യക്തിഹത്യ നടത്തുന്നതും അപായപ്പെടുത്താന്‍ ശ്രമിക്കുന്നതും ചെറുക്കും.
ആക്രമണത്തിന് പിന്നിലെ ഗൂഡാലോചന പുറത്തുകൊണ്ടുവരാന്‍ ഉന്നതതലഅന്വേഷണം നടത്തണമെന്നും അദ്ദേഹം ആവശ്യപ്പെട്ടു. സൗത്ത് മണ്ഡലം പ്രസിഡന്റ് സി.പി. വിജയകൃഷ്ണന്‍ അദ്ധ്യക്ഷനായി. ഒബിസി മോര്‍ച്ച സംസ്ഥാനപ്രസിഡന്റ് എന്‍.പി. രാധാ കൃഷ്ണന്‍, യുവമോര്‍ച്ച സംസ്ഥാന ജനറല്‍ സെക്രട്ടറി കെ. ഗണേഷ് എന്നിവര്‍ സംസാരിച്ചു.
ന്യൂനപക്ഷമോര്‍ച്ച ജില്ലാകമ്മറ്റി കിഡ്‌സണ്‍ കോര്‍ണറില്‍ സംഘടിപ്പിച്ച പ്രതിഷേധം ബിജെപി സംസ്ഥാനസമിതി അംഗം കെ. രജിനേഷ് ബാബു ഉദ്ഘാടനം ചെയ്തു. ന്യൂനപക്ഷമോര്‍ച്ച സംസ്ഥാന വൈസ് പ്രസിഡന്റ് അഡ്വ. മുഹമ്മദ് റിഷാല്‍ അദ്ധ്യക്ഷനായി. ബിജെപി ജില്ലാ സെക്രട്ടറി എം. രാജീവ് കുമാര്‍, സംസ്ഥാന കൗണ്‍സില്‍ അംഗം പി.എം. ശ്യാംപ്രസാദ്, ന്യൂനപക്ഷമോര്‍ച്ച ജില്ലാ വൈസ് പ്രസിഡന്റ് ഷെയ്‌ക്ക് ശാഹിദ്, ഒബിസി മോര്‍ച്ച ജില്ലാ സെക്രട്ടറി കെ. കൃപേഷ് എന്നിവര്‍ സംസാരിച്ചു.
