തിരുവനന്തപുരം: പിണറായി സര്ക്കാരിനെതിരെ രൂക്ഷ വിമര്ശനുമായി എസ്എന്ഡിപി ജനറല് സെക്രട്ടറി വെള്ളാപ്പള്ളി നടേശന്. ഉന്നത വിദ്യാഭ്യാസ മന്ത്രി കെ.ടി. ജലീല് സര്ക്കാരില് നടത്തുന്ന ഇടപെടലുകളും ശരിയായ തരത്തില് അല്ലെന്ന് വെള്ളാപ്പള്ളി പറഞ്ഞു.
ഈ ഇടതുപക്ഷ സര്ക്കാര് ശ്രീനാരായണീയ സമൂഹത്തിന്റെ കണ്ണില് കുത്തി. അധസ്ഥിത വിഭാഗങ്ങളെ അധികാര ശ്രേണിയില് നിന്നും ആട്ടിയകറ്റുന്ന പതിവ് ഈ സര്ക്കാര് ആവര്ത്തിച്ചു. ഈഴവ സമുദായത്തെ സര്ക്കാര് ചതിക്കുകയാണ്. ശ്രീനാരായണ ഗുരു ഓപ്പണ് സര്വകലാശാല ഉദ്ഘാടനം സര്ക്കാര് രാഷ്ട്രീയ മാമാങ്കമാക്കി. ഉദ്ഘാടന ചടങ്ങില് ഒരു എസ്എന്ഡിപി ഭാരവാഹിയെ പോലും ക്ഷണിച്ചില്ല. മലബാറില് പ്രവര്ത്തിക്കുന്ന പ്രവാസിയെ നിര്ബന്ധിച്ചു കൊണ്ടു വന്നു വിസിയാക്കാന് മന്ത്രി കെ ടി ജലീല് വാശി കാണിച്ചു. ഉന്നത വിദ്യാദ്യാസ മന്ത്രിയുടെ ചേതോവികാരം മനസിലാക്കാന് പാഴൂര് പടിപ്പുരയില് പോകേണ്ടതില്ല.
സര്വകലാശാല തലപ്പത്തെ നിയമനങ്ങള് ഇടതുപക്ഷ സര്ക്കാരിന്റെ പ്രതിച്ഛായയ്ക്ക് മങ്ങലേല്പ്പിച്ചു. സര്വകലാശാല വൈസ് ചാന്സിലര് സ്ഥാനത്തേക്ക് ശ്രീ നാരായണീയരെ പരിഗണിച്ചില്ല. നവോത്ഥാനം മുദ്രാവാക്യമാക്കിയ ഇടതുപക്ഷം ഭരിക്കുമ്പോള് ഇങ്ങനെ സംഭവിക്കാന് പാടില്ലായിരുന്നെന്നും വെള്ളാപ്പള്ളി.
