വാഷിംഗ്ടണ്: കോവിഡ് ചികിത്സയില് കഴിഞ്ഞിരുന്ന അമേരിക്കന് പ്രസിഡന്റ് ഡൊണാള്ഡ് ട്രംപ് ആശുപത്രി വിട്ടു. ‘ആശുപത്രി വിടുകയാണ്. കോവിഡിനെ ഭയപ്പെടേണ്ട. ചികിത്സയ്ക്ക് ശേഷം 20 വര്ഷം ചെറുപ്പമായി.’- അദ്ദേഹം ട്വീറ്റ് ചെയ്തു. തുടര്ന്ന് വാള്ട്ടര് റീഡ് നാഷണല് മിലിട്ടറി ആശുപത്രിയില്നിന്ന് ട്രംപ് വൈറ്റ് ഹൗസിലേക്ക് മടങ്ങി.
അതേസമയം രോഗമുക്തി നേടാതെയാണ് പ്രസിഡന്റ് ആശുപത്രി വിടുന്നതെന്ന് ഡോക്ടര് അറിയിച്ചു. ആശുപത്രിക്ക് പുറത്തു കാത്തുനിന്ന അനുയായികളെ ട്രംപ് അഭിവാദ്യം ചെയ്തു. വാള്ട്ടര് റീഡ് ആശുപത്രിയില് നിന്ന് ഹെലികോപ്ടറിലാണ് ട്രംപ് വൈറ്റ്ഹൗസിലെത്തിയത്. തുടര്ന്ന് മാസ്ക് അഴിച്ചുമാറ്റി. മൂന്ന് ദിവസമാണ് ട്രംപ് ആശുപത്രിയില് കഴിഞ്ഞത്.
വൈകാതെ തന്നെ ട്രംപ് തിരഞ്ഞെടുപ്പ് പ്രചാരണ പരിപാടികളില് സജീവമാകും.ഒക്ടോബര് രണ്ടിനാണ് ട്രംപിനും, ഭാര്യ മെലാനിയയ്ക്കും കൊവിഡ് സ്ഥിരീകരിച്ചത്. രോഗലക്ഷണം കണ്ടതിനെ തുടര്ന്ന് നടത്തിയ പരിശോധനയില് ഫലം പോസിറ്റീവ് ആവുകയായിരുന്നു. ഉപദേശകയായ ഹോപ് ഹിക്സിന് കൊവിഡ് സ്ഥിരീകരിച്ചതിനെ തുടര്ന്ന് ഇരുവരും നിരീക്ഷണത്തിലായിരുന്നു.
