തിരുവനന്തപുരം : എന്.കെ. പ്രേമചന്ദ്രന് എംപിക്ക് കൊറോണ വൈറസ് രോഗബാധ സ്ഥിരീകരിച്ചു. പാര്ലമെന്ററി വര്ഷകാല സമ്മേളനത്തില് പങ്കെടുക്കാനായി ദല്ഹിയിലാണ് അദ്ദേഹം ഇപ്പോള്. ദല്ഹി എയിംസില് ചികിത്സ തേടി.
താനുമായി കഴിഞ്ഞ ദിവസങ്ങളില് നേരിട്ട് സമ്പര്ക്കം പുലര്ത്തിയവര് കോവിഡ് പ്രോട്ടോക്കാള് പ്രകാരമുള്ള തുടര് നടപടികള് സ്വീകരിക്കേണ്ടതാണെന്നും എന്.കെ. പ്രേമചന്ദ്രന് അറിയിച്ചു. ശനിയാഴ്ച യുഡിഎഫ് എംപിമാരോടൊപ്പം പ്രേമചന്ദ്രന് വാര്ത്താ സമ്മേളനം നടത്തിയിരുന്നു. അതിനു പിന്നാലെയാണ് ഇപ്പോള് കൊറോണ സ്ഥിരീകരിച്ചിരിക്കുന്നത്.
പാര്ലമെന്റ് സമ്മേളനം തുടങ്ങുന്നതിന് മുന്നോടിയായി നടന്ന പരിശോധനയില് 28 എംപിമാര്ക്ക് കൊറോണ സ്ഥിരീകരിച്ചിരുന്നു. തുടര്ന്ന് സമ്മേളനം വെട്ടിച്ചുരുക്കാന് തീരുമാനിച്ചിരുന്നു.
