പാണത്തൂര്‍: അപ്രോച്ച് റോഡ് നിര്‍മ്മിക്കാത കല്ലപ്പള്ളി പന്നിപ്പാറയിലെ വിസിബിയുടെ ഉദ്ഘാടനം നടത്താനുള്ള അധികൃതരുടെ നീക്കം ഉപേക്ഷിക്കണമെന്ന് ബിജെപി കല്ലപ്പള്ളി ബൂത്ത് കമ്മറ്റി ആവശ്യപ്പെട്ടു. 2018-19 വര്‍ഷത്തിലാണ് നബാര്‍ഡ് ഫണ്ട് ഉപയോഗിച്ച് അമ്പത്തി ഒമ്പത് ലക്ഷത്തി ഇരുപത്തി അയ്യായിരം രൂപ എസ്റ്റിമേറ്റില്‍ പെരുമുണ്ട-ഉടിയാര്‍ തോടില്‍ പന്നിപ്പാറ എന്ന സ്ഥലത്ത് വിസിബി നിര്‍മ്മിക്കുവാന്‍ എസ്റ്റിമേറ്റ് തയ്യാറാക്കി അനുമതി നല്‍കിത്. എന്നാല്‍ പിന്നീട് പഞ്ചായത്ത് ഭരണ സമിതി ആ പ്രവൃത്തി ഉടിയാറ എന്ന സ്ഥലത്തേക്ക് മാറ്റുകയായിരുന്നു.
പന്നിപ്പാറ തോടിന്റെ ഇരുകരയിലുമുള്ള നൂറോളം കുടുംബങ്ങളുടെ വര്‍ഷങ്ങളായുള്ള ആവശ്യമായിരുന്നു ഈ തോടിന് കുറുകെ പാലം നിര്‍മ്മിക്കുകയെന്നത്. ഇവിടുത്തെ ജനങ്ങളുടെ ആവശ്യം പരിഗണിച്ചാണ് ഭരണ സമിതി പദ്ധതി കൊണ്ടുവന്നത്. എന്നാല്‍ പ്രസ്തുത പ്രദേശത്തെ ജനങ്ങളോട് ആലോചിക്കുക പോലും ചെയ്യാതെയാണ് ഉടിയാറയിലേക്ക് ഇത് മാറ്റിയത്. ഇത് മൂലം ഇപ്പോള്‍ രണ്ട് കുടുംബങ്ങള്‍ക്ക് മാത്രമാണ് പ്രയോജനം. എന്നാല്‍ അപ്രോച്ച് റോഡ് നിലവില്‍ വന്നാല്‍ പെരുമുണ്ട, കമ്മാടി പ്രദേശങ്ങളിലെ നൂറോളം കുടുംബങ്ങള്‍ക്ക് ഉപകാരപ്രദമാകും. ഇതിന് വേണ്ടി റോഡ് കടന്നു പോകേണ്ട സ്ഥലം ഉടമകളുടേയും, രാഷ്‌ട്രീയ പാര്‍ട്ടി പ്രതിനിധികളുടേയും യോഗം വിളിച്ച് ചേര്‍ക്കണമെന്നാണ് ബിജെപിയുടെ ആവശ്യം. അപ്രോച്ച് റോഡ് നിര്‍മ്മിക്കാതെയുള്ള ഉദ്ഘാടന പരിപാടി ബഹിഷ്‌കരിക്കാനാണ് ബിജെപിയുടെ തീരുമാനം.
അപ്രോച്ച് റോഡ് നിര്‍മ്മിക്കാതെ തിടുക്കത്തില്‍ ഉദ്ഘാടനം നടത്താനുള്ള നീക്കത്തിനെതിരെ ബിജെപി കല്ലപ്പള്ളി ബൂത്ത് കമ്മറ്റിയുടെ നേതൃത്വത്തില്‍ വിസിബി പരിസരത്ത് പ്രതിക്ഷേധ ധര്‍ണ്ണ നടത്തി. ധര്‍ണ്ണ ബിജെപി നിയോജക മണ്ഡലം ജനറല്‍ സെക്രട്ടറി കെ.കെ.വേണുഗോപാല്‍ ഉദ്ഘാടനം ചെയ്തു. പഞ്ചായത്ത് ജനറല്‍ സെക്രട്ടറി എം.കെ.സുരേഷ്, പഞ്ചായത്ത് കമ്മറ്റിയംഗം ശ്രീലതാ വിശ്വനാഥ്, ബൂത്ത് പ്രസിഡന്റ് പി.ബി.നന്ദകുമാര്‍, സെക്രട്ടറി ജയപ്രകാശ്, പി.യു.രാധാകൃഷ്ണന്‍, ഭുവനേശ്, സന്ദേശ്, യുവമോര്‍ച്ച നേതാക്കളായ കീര്‍ത്തന്‍ പെരുമുണ്ട, ശ്രിജിത്ത്, ശിവകൃപ, രോഹിത് എന്നിവര്‍ സംസാരിച്ചു.
