പത്തനാപുരം: ഗര്ഭിണിയടക്കം നാലുപേര്ക്ക് കൂടി സമ്പര്ക്കംവഴി കോവിഡ് സ്ഥിരീകരിച്ചതോടെ പത്തനാപുരം കുണ്ടയത്ത് സ്ഥിതി കൂടുതല് സങ്കീര്ണമായി. നിലവില് കണ്ടൈന്മെന്റ് സോണായി തുടരുന്ന കുണ്ടയം, മൂലക്കട, കാരമ്മൂട്, മാര്ക്കറ്റ് തുടങ്ങിയ വാര്ഡുകളില് പോലീസ് നിരീക്ഷണത്തിന് പുറമെ മോട്ടോര്വാഹനവകുപ്പും പരിശോധന ശക്തമാക്കി.
പഴുതടച്ച പരിശോധനയാണ് കുണ്ടയം മേഖലയില് മോട്ടോര്വാഹനവകുപ്പിന്റെ എന്ഫോഴ്സ്മെന്റ് വിഭാഗം നടത്തുന്നത്. വാഹനങ്ങള് ഒരു കാരണവശാലും കുണ്ടയം മേഖലയിലേക്ക് കടത്തിവിടില്ല. കണ്ടൈന്മെന്റ് സോണായി തുടരുന്ന വാര്ഡുകളില് നിന്ന് അടിയന്തര ആവശ്യങ്ങള്ക്കല്ലാതെ പുറത്തേക്കും വാഹനങ്ങള് കടത്തി വിടില്ല.
ഒന്നിടവിട്ട ദിവസങ്ങളിലായി മോട്ടോര്വാഹനവകുപ്പിന്റെ രണ്ട് സ്ക്വഡുകളാണ് പരിശോധിക്കുന്നത്. നിയമലംഘകരെ പിടികൂടാനായി ഡിജിറ്റല് പരിശോധനയാണ് നടത്തുന്നതെന്ന് അസി. മോട്ടോര് വെഹിക്കിള് ഇന്സ്പെക്ടര് ഡി. ശരത് പറഞ്ഞു. നിലവില് കുണ്ടയം മേഖലയില് കോവിഡ് ബാധിച്ചവരുടെ എണ്ണം പത്തായി.
