ഭാരതീയ വാസ്തുവിദ്യ കാലികമായ മാറ്റങ്ങള് ഉള്ക്കൊണ്ട് വികസിച്ചു വന്ന നിര്മാണരീതിയാണ്. അടിസ്ഥാന തത്വങ്ങളില് ഊന്നിക്കൊണ്ട് കാലഘട്ടത്തിനനുസരിച്ച് മറ്റു നിര്മാണരീതികളുടെ ഗുണഫലങ്ങളെ സ്വാംശീകരിച്ച് വികസിച്ചു വന്ന തനത് ശൈലിയാണത്. അതുകൊണ്ട് തന്നെ സനാതനവുമാണ്. ആധുനിക നിര്മാണ രീതിയായ ഫഌറ്റ് സമ്പ്രദായത്തില് വാസ്തു എങ്ങനെ പാലിക്കാം എന്നുള്ളത് പ്രാചീന പ്രാസാദ നിര്മാണരീതിയില് നിന്ന് ഉള്ക്കൊള്ളാവുന്നതാണ്. പല നിലകളിലുള്ള രാജകൊട്ടാരങ്ങളുടെയും മന്ത്രിഭവനങ്ങളുടെയും നിയമങ്ങള് ഗ്രന്ഥങ്ങളില് കാണാവുന്നതാണ്. ഇവകളുടെ ഒരു പരിഷ്കരിച്ച രൂപം തന്നെയാണ് ഫഌറ്റുകളും.
ഒരേ നിര്മാണത്താല് ഒരു പാട് പേരെ സ്വാധീനിക്കുന്ന ഒന്നാകയാല് ഫഌറ്റ് നിര്മാണങ്ങളില് പാലിക്കപ്പെടേണ്ട കെട്ടിട നിര്മാണ അടിസ്ഥാന നിയമങ്ങള് സമാനമെങ്കിലും മറ്റു പ്രധാന വാസ്തു നിയമങ്ങള് ഒന്നു വ്യക്തമാക്കാം. ആദ്യമായി നിര്മാണത്തിന് സ്വീകരിക്കുന്ന ഭൂമി ദീര്ഘചതുരാകൃതിയുള്ളതോ അപ്രകാരം പുനഃക്രമീകരിച്ചതോ ആകണം. ഭൂമിയില് നിര്മാണത്തിന് കൃത്യമായ കാന്തിക ദിശാവിന്യാസം നല്കേണ്ടതും പ്രധാനമാണ്. എങ്കില് മാത്രമേ ഓരോ ഗൃഹത്തിനും സ്വാഭാവികമായ ദര്ശനവും നിര്മാണ വിന്യാസവും സാധ്യമാകൂ.
ഓരോ ഗൃഹത്തിന്റെയും പ്രവേശന ദ്വാരങ്ങള് പ്രധാന ദിക്കുകളിലേക്ക് ദര്ശനം വരുന്ന രീതിയിലും തെക്കു പടിഞ്ഞാറു ഭാഗം ഒഴിവാക്കിയും ക്രമീകരിക്കപ്പെട്ടതാകണം. വായു -പ്രകാശ പ്രവാഹങ്ങള്ക്ക് തടസമില്ലാത്ത വിധമുള്ള രൂപകല്പ്പനയും ആയിരിക്കണം ഓരോ യൂണിറ്റുകള്ക്കും. ഇതിനായി ‘സര്വതോഭദ്രം’ ശൈലിയിലുള്ള നാലുകെട്ടുകളുടെ നടുമുറ്റ – അന്തരാള (ഇടനാഴി) വിന്യാസ ശൈലി സ്വീകരിക്കുകയാണുചിതം. ഇതിന്റെ സമന്വയത്താല് കൂടുതല് വിശാലമാക്കുകയും കൂടുതല് ഗൃഹങ്ങള് വരത്തക്ക വിധം വലുതാക്കുകയുമാകാം.
അടുക്കളകള് തെക്കു പടിഞ്ഞാറ് ദിശകളിലും തെക്കോട്ടു ദര്ശനമായി പാകം ചെയ്യുന്ന വിധത്തിലും ക്രമീകരിക്കരുത്. ഒരേ സ്ലാബില് അടുപ്പും വാഷ് ബേസിനും കൊടുക്കുന്ന രീതിയും ഒഴിവാക്കണം. അടുക്കളയില് നിന്നു പുറത്തേക്ക് വായു പ്രവാഹം ഉണ്ടാകുന്ന രീതിയില് ആയിരിക്കണം സ്ഥാനനിര്ണയം. ബെഡ്റൂമുകളില് ബെഡ് കിഴക്കോട്ടോ തെക്കോട്ടോ തലവെച്ചു കിടക്കുന്ന രീതിയിലും തെക്കു പടിഞ്ഞാറ്, വടക്കു കിഴക്ക് ഭാഗങ്ങളിലും ബെഡിനു നേര്ക്ക് വാതില് വരാത്ത വിധവും കിടപ്പുമുറികള് വിന്യസിക്കണം.
ശുചി മുറികള് ഓരോ ഗൃഹങ്ങളുടെയും തെക്കു പടിഞ്ഞാറ്, വടക്കു കിഴക്ക് ഭാഗങ്ങളില് വരാത്ത വിധവും, ഒരേ നിരയില് വരുന്ന വിധവുമായിരിക്കണം. ബാല്ക്കണികള് തെക്കു പടിഞ്ഞാറ് കോണില് വരാത്ത വിധം ക്രമീകരിക്കുവാനും ശ്രദ്ധിക്കണം. ലിഫ്റ്റുകള്, കോണി പടവുകള് എന്നിവ തെക്ക് അല്ലെങ്കില് പടിഞ്ഞാറ് ഭാഗത്തേക്ക് നല്കുന്നതാണ് നല്ലത്. നാലു ഇടനാഴികള് സ്ഥാപിക്കുക വഴി അതിലൂടെ അടിയന്തിര പുറംവാതില് സൗകര്യം ഒരുക്കാനും സാധിക്കും.
ഫഌറ്റുകളില് ഒരെണ്ണം വാസത്തിനായി തിരഞ്ഞെടുക്കുമ്പോള് അത് വടക്കു കിഴക്കോ തെക്കു പടിഞ്ഞാറോ ഉള്ള ഗൃഹമാണെങ്കില് കൂടുതല് നല്ലതാണ്. കിഴക്ക്/പടിഞ്ഞാറ് ദര്ശനത്തോടു കൂടിയവയും ഉചിതം തന്നെ. പ്രധാനവാതിലിനു നേര്ക്ക്, കിഴക്ക്, പടിഞ്ഞാറ് ദര്ശനമായി ദേവതാ ചിത്രങ്ങള് സ്ഥാപിക്കുന്നതും ശുഭകരമാണ്.
വലിയ ശുദ്ധജല സംഭരണികള് ഭൂമിക്കടിയില് വടക്കു കിഴക്ക് ഭാഗത്തേക്ക് സ്ഥാപിക്കണം. സെപ്റ്റിക് ടാങ്കുകള് ആവശ്യമെങ്കില് വടക്കു പടിഞ്ഞാറെ ഭാഗത്തേക്ക് ക്രമീകരിക്കണം.
ഡോ. രാധാകൃഷ്ണന് ശിവന്
