തൃശൂര്‍ : സംസ്ഥാനത്ത് വീണ്ടും ഒരു കൊറോണ മരണം കൂടി. ജൂലൈ 5ന് കുഴഞ്ഞു വീണ് മരിച്ച തൃശൂര്‍ അരിമ്പൂര്‍ സ്വദേശി വത്സലയ്‌ക്കാണ് കൊറോണ സ്ഥിരീകരിച്ചിരിക്കുന്നത്. ഇത്തവണയും മരണത്തിന് ശേഷമാണ് രോഗം സ്ഥിരീകരിച്ചിരിക്കുന്നത്.
രണ്ട് തവണ ട്രൂനാറ്റ് പരിശോധന നടത്തിയെങ്കിലും ഫലം നെഗറ്റീവായിരുന്നു. ഇതിന്റെ പശ്ചാത്തലത്തില്‍ ഇവരുടെ സംസ്‌കാര ചടങ്ങുകള്‍ നടത്തുകയും ചെയ്തിരുന്നു. എന്നാല്‍ പോസ്റ്റ്‌മോര്‍ട്ടത്തിന് മുമ്പെടുത്ത സാമ്പിളില്‍ ഫലം പോസിറ്റീവ് ആവുകയായിരുന്നു.
നേരത്തെ രോഗബാധ സ്ഥിരീകരിച്ച കെഎസ്ആര്‍ടിസി ബസ് കണ്ടക്ടര്‍ ഉണ്ടായിരുന്ന ബസ്സില്‍ വത്സലയുടെ മകള്‍ യാത്ര ചെയ്തിരുന്നു. എന്നാല്‍ മകള്‍ക്ക് രോഗലക്ഷണമൊന്നും പ്രകടമായിരുന്നില്ല. ഇവരുടെ നിരീക്ഷണ കാലാവധി ഇന്ന് അവസാനിക്കും. ഇവരില്‍ നിന്നാകാം വത്സലക്ക് രോഗം പിടിപെട്ടതെന്നാണ് നിഗമനം.
്അതേസമയം പോസ്റ്റ്‌മോര്‍ട്ടത്തിന് മുമ്പെടുത്ത സാമ്പിളിന്റെ ഫലം വരുന്നതിന് മുമ്പാണ് വത്സലയുടെ ശവസംസ്‌കാര ചടങ്ങുകള്‍ നടന്നത്. അതുകൊണ്ട് തന്നെ കൊവിഡ് പ്രോട്ടോകോള്‍ പാലിക്കാതെയായിരുന്നു ചടങ്ങുകള്‍. ഇത് അധികൃതര്‍ക്കിടയില്‍ ആശങ്ക ഉയര്‍ത്തുന്നുണ്ട്.
