തൊടുപുഴ: ലക്ഷം രൂപ ലോട്ടറി അടിച്ച ഭാഗ്യവാന്‍ ലോട്ടറി ഓഫീസിലെത്തിയപ്പോള്‍ തുക നല്‍കിയില്ലെന്ന് പരാതി. ലോട്ടറി വില്‍പ്പന മൂലം ദിവസേന ലക്ഷങ്ങള്‍ ലഭിക്കുന്ന ജില്ലാ ലോട്ടറി ഓഫീസില്‍ കോവിഡ് മൂലം ഒരു രൂപ പോലും എടുക്കാനില്ലെന്ന മറുപടി നല്‍കി ഉദ്യോഗസ്ഥര്‍ ടിക്കറ്റ് വാങ്ങി പണം നല്‍കിയില്ല.
മുട്ടം അയ്യാനിക്കാട്ട് സുരേഷിനാണ് കഴിഞ്ഞ രണ്ടിന് നറുക്കെടുപ്പ് നടന്ന കാരുണ്യ പ്ലസ് ഭാഗ്യക്കുറിയുടെ ഒരു ലക്ഷം സമ്മാനമായി ലഭിച്ചത്. ഏജന്റില്‍ നിന്നും വിവരമറിഞ്ഞാണ് സുരേഷ് കഴിഞ്ഞ ദിവസം തൊടുപുഴയിലെ ലോട്ടറി ഓഫീസിലെത്തിയത്. നിലവില്‍ സമ്മാനതുക നല്‍കാന്‍ പണമില്ലെന്നും പിന്നീട് വരാനുമായിരുന്നു മറുപടി.
ഇതിനിടെ സുരേഷ് ബാങ്കില്‍ ലോട്ടറി നല്‍കിയെങ്കിലും ഒരു ലക്ഷം വരെ ലോട്ടറി ഓഫീസില്‍ നിന്നാണ് നല്‍കുന്നതെന്ന് ബാങ്ക് അധികൃതര്‍ മറുപടി നല്‍കി. പിന്നീട് വീണ്ടും ലോട്ടറി ഓഫീസിലെത്തിയെങ്കിലും പാന്‍ കാര്‍ഡുമായി വരാന്‍ നിര്‍ദേശിച്ചു. സുരേഷിന് പാന്‍ കാര്‍ഡ് ഇല്ലാതിരുന്നതിനാല്‍ പാന്‍കാര്‍ഡുള്ള സഹോദരനുമായി ഇന്നലെ രാവിലെ എത്തിയെങ്കിലും പിന്നീട് വരാന്‍ അറിയിച്ചു. ഇതോടെ സമ്മാനതുകയ്‌ക്കായി പല തവണ ഓഫീസ് കയറിയിറങ്ങിയതിന്റെ നിരാശയിലായി സുരേഷ്. അതേ സമയം പാന്‍ കാര്‍ഡുള്ള സഹോദരന്റെ അപേക്ഷയില്‍ ഇന്നലെ ലോട്ടറി കൈപ്പറ്റിയെന്നും കൊറോണ മൂലം സാമ്പത്തിക പ്രതിസന്ധി നില
നില്‍ക്കുന്നതിനാലാണ് തുക ലഭിക്കാന്‍ വൈകുന്നതെന്നുമാണ് ഉദ്യോഗസ്ഥര്‍ പറയുന്നത്. ഒരു ലക്ഷം സമ്മാനം ലഭിച്ചാല്‍ 30% നികുതിയും കമ്മീഷന്‍ തുകയും കഴിച്ച് 63000 രൂപ ലഭിക്കും. ഈ തുക നല്‍കാനാണ് ജില്ലാ ലോട്ടറി ഓഫീസ് അധികൃതര്‍ വിസമ്മതിച്ചത്.
