കാഞ്ഞങ്ങാട്: സൗഹൃദത്തിലും പഠനത്തിലും എ പ്ലസ് നേടി ഒരു നാടിന്റെ അഭിമാനമായി മാറുകയാണ് ഈ കൂട്ടുകാരികള്. കഴിഞ്ഞ പത്ത് വര്ഷവും ഇണപിരിയാത്ത ഒന്നിച്ച് പഠിച്ച് മുന്നേറിയ കൂട്ടുകാരികള് എസ്എസ്എല്സി പരീക്ഷയിലും എല്ലാ വിഷയങ്ങള്ക്കും എ പ്ലസ് നേടി.
മാവുങ്കാല് സ്വാമി രാംദാസ് മെമ്മോറിയല് ഗവ ഹയര്സെക്കന്ഡറി സ്കൂളിലെ പത്താംതരം വിദ്യാര്ഥികളായ വാഴക്കോട് ശിവജി നഗറിലെ കെ.വി.വിനോദിന്റയും ശിവലക്ഷിയുടെയും മകളായ കെ.ആദിത്യയും, കോട്ടപ്പാറയിലെ കെ.വിനോദിന്റെയും ടി.വി ബിന്ദുവിന്റെയും മകളായ കെ.അമൃതേന്ദു, എം. അഭയന്റെയും എന്.എ ശാന്തിനി മകളായ പൂജാ ലക്ഷ്മിയുമാണ് മികവിന്റെ നൂറ് മേനി കൊയ്തത്.
കോട്ടപ്പാറ അംഗന്വാടിയില് നിന്നാണ് മൂവരും സൗഹൃദം തുടങ്ങുന്നത്. നാലാംക്ലാസ് വരെ വാഴക്കോട് ഗവ എല് പി സ്കൂളിലും തുടര്ന്ന് പത്താം തരം വരെയുള്ള പഠനത്തില് രാംനഗര് സ്കൂളിലും ഒരുമിച്ച് ഒരേ ബെഞ്ചിലിരുന്ന് പഠിച്ചു. പ്ലസ്ടു പഠനത്തിലും ഒരേ സ്കൂളില് പ്രവേശനം ലഭിക്കാനുള്ള പ്രാര്ത്ഥനയിലാണിവര്.
