ഇടുക്കി: ജില്ലയില്‍ കൊറോണ രോഗികളുടെ എണ്ണം വര്‍ധിക്കുന്ന സാഹചര്യത്തില്‍, സാമൂഹിക അകലവും കോവിഡ് പ്രതിരോധ മാനദണ്ഡങ്ങളും കര്‍ശനമായി പാലിക്കേണ്ടതാണെന്ന് ജില്ലാ മെഡിക്കല്‍ ഓഫീസര്‍ ഡോക്ടര്‍ പ്രിയ. എന്‍. അറിയിച്ചു.
ലോക്ക് ഡൗണിനുശേഷം അണ്‍ലോക്ക് രണ്ടാംഘട്ടത്തില്‍ എത്തി നില്‍ക്കുമ്പോള്‍ ഓരോരുത്തരുടെയും സുരക്ഷിതത്വം അവരവരുടെ ഉത്തരവാദിത്വമാണ്. അത്യാവശ്യം ഉള്ളപ്പോള്‍ മാത്രം ആളുകള്‍ വീടിന് പുറത്തിറങ്ങുക. പുറത്തിറങ്ങുമ്പോള്‍ മുഖാവരണം വായും മൂക്കും മൂടുന്ന വിധം ശരിയായ രീതിയില്‍ ധരിക്കുക. സംസാരിക്കുമ്പോഴും ചുമയ്‌ക്കുമ്പോഴും തുമ്മുമ്പോഴും മാസ്‌ക് ഒരു കാരണവശാലും താഴ്‌ത്തരുത്. മാസ്‌ക് ഒരിടത്തും വലിച്ചെറിയാതെ ശരിയായ വിധം നിര്‍മ്മാര്‍ജ്ജനം ചെയ്യുക.
കൈകള്‍ ഇടയ്‌ക്കിടെ സാനിറ്റൈസ് ചെയ്യുകയോ, സോപ്പ് ഉപയോഗിച്ച് കഴുകുകയോ ചെയ്യേണ്ടതാണ്. കൈകള്‍ കൊണ്ട് മുഖത്ത് സ്പര്‍ശിക്കാതിരിക്കാന്‍ പ്രത്യേക ശ്രദ്ധ ഉണ്ടാവണം. കൈകള്‍ കൊണ്ട് മറ്റു വസ്തുക്കളിലുള്ള സ്പര്‍ശനവും പരമാവധി ഒഴിവാക്കേണ്ടതാണ്. സമീപത്തുള്ള ഏതൊരാളും കോവിഡ് രോഗി ആകാന്‍ സാധ്യതയുണ്ട് എന്ന് കരുതിക്കൊണ്ട കൃത്യമായ സാമൂഹിക അകലം പാലിക്കാന്‍ ഓരോരുത്തരും ശ്രദ്ധിക്കേണ്ടതാണ്. പൊതുസ്ഥലത്ത് തുപ്പാതിരിക്കാനും പ്രത്യേകം ശ്രദ്ധിക്കണം.
വ്യാപാരസ്ഥാപനങ്ങളില്‍ നിഷ്‌കര്‍ഷിച്ചിരിക്കുന്ന എണ്ണം ആളുകളെ മാത്രമേ പ്രവേശിപ്പിക്കാവൂ. എല്ലാ ഉപഭോക്താക്കളുടെയും കൈകള്‍ സാനിറ്റൈസ് ചെയ്ത ശേഷം മാത്രം അകത്ത് കടക്കുക. ലോഡിങ് തൊഴിലാളികള്‍ കൈകള്‍ ഇടയ്‌ക്കിടെ സോപ്പ് ഉപയോഗിച്ച് കഴുകണം.
വീട്ടില്‍ ക്വാറൈന്റനില്‍ കഴിയുന്നവര്‍, വീട്ടിലെ മറ്റുള്ളവരുമായി ഇടപഴകാതെ ഒരു റൂമില്‍ തന്നെ കഴിയണം. ക്വാറൈന്റനില്‍ കഴിയുന്നവര്‍ക്ക് ആരോഗ്യപ്രശ്നങ്ങള്‍ ഉണ്ടാവുകയാണെങ്കില്‍ ആരോഗ്യ പ്രവര്‍ത്തകരെ വിവരം അറിയിക്കണം. ക്വാറന്റൈന്‍ മാര്‍ഗ്ഗനിര്‍ദ്ദേശങ്ങള്‍ ലംഘിക്കുന്നവര്‍ക്കെതിരെ നടപടി സ്വീകരിക്കുമെന്നും വിവിധ വകുപ്പ് അധികൃതര്‍ പറയുന്ന നിര്‍ദ്ദേശങ്ങള്‍ കൃത്യമായി പാലിക്കുകയും, കോവിഡില്‍ നിന്നും സുരക്ഷിതരാവുകയും ചെയ്യണമെന്ന് ജില്ലാ മെഡിക്കല്‍ ഓഫീസര്‍ അറിയിച്ചു.
