ന്യൂദല്‍ഹി: കേന്ദ്രസര്‍ക്കാര്‍ ശ്രീനാരായണ ഗുരു തീര്‍ത്ഥാടന സര്‍ക്യൂട്ട് അട്ടിമറിച്ചെന്ന വ്യാജപ്രചരണം പൊളിഞ്ഞു. പദ്ധതി ഉപേക്ഷിച്ചിട്ടില്ലന്നും നടപ്പാക്കുമെന്നും കേന്ദ്ര ടുറിസം വകുപ്പ് സംസ്ഥാന സര്‍ക്കാറിനെ ഔദ്യോഗികമായി അറിയിച്ചു. കത്ത് ലഭിച്ച കാര്യം സംസ്ഥാന ടുറിസം മന്ത്രി കടകംപള്ളി സുരേന്ദ്രന്‍ സമ്മതിക്കുകയും ചെയ്തു.
69.47 കോടി രൂപയുടെ ശ്രീനാരായണ ഗുരു തീര്‍ത്ഥാടന സര്‍ക്യൂട്ട് പദ്ധതി കേന്ദ്രം പ്രഖ്യാപിച്ചെങ്കിലും സംസ്ഥാന സര്‍ക്കാര്‍ ചെയ്യേണ്ട കാര്യങ്ങളൊന്നും ചെയ്തില്ല. ശബരിമലക്ക് നല്‍കിയ നൂറ് കോടിയില്‍ അഞ്ച് കോടി മാത്രമാണ് വിനിയോഗിച്ചത്. ആരാധാനാലയങ്ങളുടെ അടിസ്ഥാന സൗകര്യ വികസിപ്പിക്കാന്‍ കേരളത്തിലനുവദിച്ച 85.22 കോടി രൂപയുടെ സ്പിരിച്ചല്‍ ടൂറിസം പദ്ധതിയും മുന്നോട്ടു പോയില്ല. പ്രഖ്യാപിച്ചിട്ടും പ്രവൃത്തികള്‍മുന്നോട്ടു പോകാത്ത പദ്ധതികള്‍ക്ക് വീണ്ടും പണം അനുവദിക്കേണ്ടതില്ല എന്നത് കേന്ദ്ര നയമാണ്. അത്തരം പദ്ധതികളുടെ പട്ടിക തയ്യാറാക്കിയപ്പോള്‍ ശ്രീനാരായണ ഗുരു തീര്‍ത്ഥാടന സര്‍ക്യൂട്ട് പദ്ധതിയും ഉള്‍പ്പെട്ടു.
ഇതിനെ വലിയ രാഷ്‌ട്രീയ വിഷയമായി അവതരിപ്പിക്കാനാണ് കോണ്‍ഗ്രസും സിപിഎമ്മും ശ്രമിച്ചത്. കേന്ദ്രമന്ത്രി വി മുരളീധരന്‍ കേന്ദ്ര ടൂറിസം മന്ത്രിയുമായി സംസാരിക്കുകയും പദ്ധതി ഉപേക്ഷിക്കില്ലന്ന് ഉറപ്പു വാങ്ങുകകയും ചെയ്തു. അക്കാര്യം ശിവഗിരി മഠം അധികൃതരെ അറിയിച്ചിരുന്നു. അക്കാര്യം സംസ്ഥാന സര്‍ക്കാറിനെ ഔദ്യോഗികമായി അറിയിച്ചിരിയക്കുകയാണിപ്പോള്‍.
ശ്രീനാരായണ ഗുരു തീര്‍ത്ഥാടന സര്‍ക്യൂട്ട് ഉപേക്ഷിക്കാനുള്ള തീരുമാനം പിന്‍വലിക്കണമെന്ന് ആവശ്യപ്പെട്ട് താന്‍ കത്തു നല്‍കിയതിനെ തുടര്‍ന്നാണ് തീര്‍ത്ഥാടന സര്‍ക്യൂട്ട് പുനരുജ്ജീവിപ്പിക്കുന്നതെന്ന അവകാവാദവുമായി മന്ത്രി കടകംപള്ളി സുരേന്ദ്രന്‍ വന്നിട്ടുണ്ട്. പദ്ധതി നടത്തിപ്പ് സംസ്ഥാന ടൂറിസം വകുപ്പിനെ ഏല്‍പ്പിക്കണമെന്നും മന്ത്രി ആവശ്യപ്പെട്ടു. ശ്രീനാരായണ തീര്‍ത്ഥാടന സര്‍ക്യൂട്ട് പദ്ധതി കേന്ദ്ര സ്ഥാപനമായ ഐടിഡിസിയെയാണ് നേരത്തെ ഏല്‍പ്പിച്ചിരുന്നത്
. ശ്രീനാരായണ ഗുരുവിന്റെ ജീവിതവുമായി ബന്ധപ്പെട്ട ചരിത്രപ്രാധാന്യമുള്ള സ്ഥലങ്ങള്‍ കോര്‍ത്തിണക്കിയാണ് ഈ തീര്‍ത്ഥാടന സര്‍ക്യൂട്ട് ആവിഷ്‌കരിച്ചത്. ഗുരു ജനിച്ച ചെമ്പഴന്തി ശ്രീ നാരായണ ഗുരുകുലം, അരുവിപ്പുറം, അണിയൂര്‍ ശ്രീ ദുര്‍ഗാദേവീ ക്ഷേത്രം, കോലത്തുകര ശിവക്ഷേത്രം, കന്നുംപാറ സുബ്രഹ്മണ്യസ്വാമിക്ഷേത്രം, മണ്ണന്തല ആനന്ദവല്ലീശ്വരം ക്ഷേത്രം, തോന്നയ്‌ക്കല്‍ കുമാരനാശാന്‍ സ്മാരകം, കായിക്കര കുമാരനാശാന്‍ സ്മാരകം, ശിവഗിരി ശ്രീനാരായണ ഗുരു ആശ്രമം എന്നിവയെല്ലാം ബന്ധപ്പെടുത്തിയുള്ള തീര്‍ത്ഥാടന സര്‍ക്യൂട്ടിന്റെ ഭാഗമായി വന്‍തോതിലുള്ള വികസന പ്രവര്‍ത്തനങ്ങളാണ് ഇതിലൂടെ വിഭാവനം ചെയ്തത്.
അരുവിപ്പുറത്ത് നിന്ന് ശിവഗിരി വരെ നീളുന്ന തീര്‍ത്ഥാടന സര്‍ക്യൂട്ടില്‍ ഗുരുവിന്റെ ജീവിതത്തിലെ പ്രധാന സംഭവങ്ങള്‍ അതാതിടങ്ങളില്‍ രേഖപ്പെടുത്തും. ശിവഗിരിയില്‍ ലൈറ്റ് ആന്റ് സൗണ്ട് ഷോ സംവിധാനം, ഓപ്പണ്‍ എയര്‍ തീയേറ്റര്‍, ടൂറിസ്റ്റ് ഫെസിലിറ്റേഷന്‍ സെന്റര്‍, രണ്ടായിരം പേര്‍ക്ക് ഇരിക്കാവുന്ന ഭക്ഷണശാല, ആരോഗ്യ ശുശ്രൂഷാകേന്ദ്രം,ഔഷധ സസ്യ തോട്ടം, ജലസംഭരണി, മഴവെള്ള സംഭരണി, പാര്‍ക്കിഗ് സൗകര്യം, സൗരോര്‍ജ പ്ലാന്റ്, ബാറ്ററിയില്‍ പ്രവര്‍ത്തിക്കുന്ന വാഹനങ്ങള്‍, കാത്തിരിപ്പ് കേന്ദ്രങ്ങള്‍ തുടങ്ങിയ സൗകര്യങ്ങള്‍ തീര്‍ത്ഥാടന സര്‍ക്യൂട്ടിന്റെ ഭാഗമായി ഒരുക്കും. ശിവഗിരി മഠത്തിലെ വൈദ്യുതി ലൈനുകള്‍ ഭൂമിക്കടിയില്‍ മാറ്റി സ്ഥാപിക്കാനും പദ്ധതിയില്‍ നിര്‍ദ്ദേശമുണ്ട്.. അരുവിപ്പുറത്ത് സ്ഥാപിക്കുന്ന മ്യൂസിയം കോംപ്ലക്‌സില്‍ ആര്‍ട്ട് ഗ്യാലറിയും മള്‍ട്ടിമീഡിയ സംവിധാനവും,ഗവേഷണ കേന്ദ്രവും, ലൈബ്രറിയും ഒരുക്കുന്നതിനൊപ്പം അരുവിപ്പുറത്തെ ഗുഹകളുടെ സംരക്ഷണം, ദശ പുഷ്പ പാര്‍ക്ക്, പ്രാഥമിക ചികിത്സാ സൗകര്യങ്ങള്‍, കല്ലുകള്‍ പാകിയ നടപ്പാതകള്‍, മലമുകളില്‍ യോഗാകേന്ദ്രം എന്നിവയും ഒരുക്കുന്നതിനാണ് പദ്ധതിയിട്ടത്. ചെമ്പഴന്തി ശ്രീനാരായണ ഗുരുകുലത്തില്‍ പ്രകാശ സംവിധാനങ്ങള്‍, ആധുനിക ഭക്ഷണശാല, ഡിസ്‌പെന്‍സറി,പാര്‍ക്കിംഗ് സൗകര്യം, കുന്നുംപാറ ക്ഷേത്രത്തില്‍ കണ്‍വെന്‍ഷന്‍ സെന്റര്‍, പ്രാര്‍ത്ഥനാ മന്ദിരം, യോഗാ കേന്ദ്രം, ടൂറിസ്റ്റ് ഫെസിലിറ്റേഷന്‍ സെന്റര്‍, നടപ്പാതകള്‍, മഴവെള്ള സംഭരണി, സോളാര്‍ പ്ലാന്റ്, പ്രവേശന കവാടം എന്നിവയും നിര്‍മ്മിക്കും.
