കുണ്ടറ: ലോക്ഡൗണ് കാലത്ത് വീടുകളില് പാചകവാതകവിതരണ സിലിണ്ടറുകള് വിതരണം നടത്തുന്നത് ആശങ്കയോടെയെന്ന് തൊഴിലാളികള്. ജില്ലയില് നൂറിലധികം ഗ്യാസ് ഏജന്സികളുടെ കീഴില് ആയിരത്തിലധികം വിതരണ തൊഴിലാളികളുണ്ട്.
അവശ്യ സര്വീസില് ഉള്പ്പെടുത്തിയ ജോലിയാണിത്. ഗ്യാസ് ഏജന്സികള് ലോക്ഡൗണ് കാലത്ത് റെഡ്സോണ് പ്രദേശങ്ങളിലും ഗ്യാസ് വിതരണത്തിന് നിരോധനം ഏര്പ്പെടുത്തിയിരുന്നില്ല.
ഒരു ദിവസം ഒരാള് മുപ്പതിലേറെ വീടുകളിലാണ് സിലിണ്ടറുകള് എത്തിക്കുന്നത്. ചിലയിടങ്ങളില് അടുക്കളയിലെത്തിയും ഇവ നല്കേണ്ടി വരും. കോവിഡ് നിയന്ത്രണ മേഖലകളിലും രോഗം സ്ഥിരീകരിച്ചവരുടെ അയല്പക്കങ്ങളിലും നിരീക്ഷണത്തില് കഴിയുന്നവരുടെ വീടുകളിലും വിവരമറിയാതെ കടന്നുചെല്ലുന്ന സാഹചര്യങ്ങളും ഇവരുടെ ജോലിയിലുണ്ട്. കൂടാതെ അടച്ചുകെട്ടിയ റോഡുകളില് തടസ്സങ്ങള് നീക്കിയും സഞ്ചരിക്കേണ്ടി വരുന്നു.
അവശ്യ സേവനമെന്ന നിലയില് യാതൊരു സുരക്ഷാമുന്കരുതലുകളും പലപ്പോഴും ഉണ്ടാകാതെയാണ് തൊഴിലെടുക്കുന്നതെന്ന് ഇവര് ചൂണ്ടിക്കാട്ടുന്നു. ഈ സാഹചര്യത്തില് ആരോഗ്യവകുപ്പിന്റെ ഭാഗത്തുനിന്ന് പരിശോധനകളും സുരക്ഷാ മുന്കരുതല് സംവിധാനങ്ങളും വേണമെന്നാണ് തൊഴിലാളികളുടെ ആവശ്യം.
