കാസര്‍കോട് രണ്ട് പേര്‍ക്ക് കൂടി കോവിഡ്

കാസര്‍കോട്: കാസര്‍കോട് ജില്ലയില്‍ ഇന്നലെ രണ്ട് പേര്‍ക്ക് കൂടി കോവിഡ് 19 സ്ഥിരീകരിച്ചു. ഇരുവരും മഹാരാഷ്‌ട്രയില്‍ നിന്നെത്തിയവരാണ്. മെയ് 31 ന് ബസിനെത്തിയ 49 വയസുള്ള കുമ്പള പഞ്ചായത്ത് സ്വദേശി, ജൂണ്‍ ആറിന് ട്രെയിനിന് വന്ന 65 വയസുള്ള പള്ളിക്കര പഞ്ചായത്ത് സ്വദേശി എന്നിവര്‍ക്കാണ് കോവിഡ് പോസിറ്റീവായത്. കുമ്പള സ്വദേശി സര്‍ക്കാര്‍ നിയന്ത്രണത്തിലുള്ള ക്വാറന്റീനിലും പള്ളിക്കര സ്വദേശി പരിയാരം മെഡിക്കല്‍ കോളേജിലുമാണുള്ളത്. ഇതോടെ ജില്ലയില്‍ കോവിഡ് ചികിത്സയിലുള്ളവരുടെ എണ്ണം 111 ആയി. വീടുകളില്‍ 3340 പേരും ആശുപത്രികളില്‍ 411 പേരുമുള്‍പ്പെടെ ജില്ലയില്‍ കോവിഡ് നിരീക്ഷണത്തിലുള്ളത് 3751 പേരാണ്. 533 പേരുടെ പരിശോധനാ ഫലം ലഭിക്കാനുണ്ട്. പുതിയതായി 165 പേരെ കൂടി നിരീക്ഷണത്തില്‍ പ്രവേശിപ്പിച്ചു.