ന്യൂദല്ഹി: വടക്കുകിഴക്കന് ദല്ഹിയില് ഫെബ്രുവരിയില് നടന്ന വര്ഗീയ കലാപവുമായി ബന്ധപ്പെട്ട് ദല്ഹി പോലീസ് പുതിയ കുറ്റപത്രങ്ങള് കൂടി കോടതിയില് സമര്പ്പിച്ചു. ഗുതുരതമായ കണ്ടെത്തലുകളാണ് കുറ്റപത്രത്തില് ഉള്പ്പെട്ടിരിക്കുന്നത്. മുസ്ലിം മതമൗലികവാദികളുടെ ഒരു സംഘം ഹിന്ദുക്കളെ ലക്ഷ്യമിട്ട് നടത്തിയത് അതിക്രൂര ആക്രമണമെന്ന് കുറ്റപത്രത്തില് വ്യക്തമാക്കുന്നു. ദില്ബര് നേഗി എന്ന യുവാവിനെ വാളുപയോഗിച്ച് വെട്ടിയ ശേഷം ജീവനോടെ കത്തിക്കുകയായിരുന്നെന്ന് കുറ്റപത്രത്തില് വ്യക്തമാക്കുന്നു. മധുരങ്ങള് വില്ക്കുന്ന അനില് സ്വീറ്റ്സ് കടയ്ക്കുള്ളില് ജോലി ചെയ്തു കൊണ്ടു നിന്നപ്പോഴാണ് ഹിന്ദുക്കളുടെ സ്ഥാപനങ്ങള് ലക്ഷ്യമിട്ട് അക്രമകാരികള് എത്തിയത്. അവിടെവച്ചാണ് നേഗിയെ കൊല്ലുന്നതും.
ഡിആര്പി കോണ്വെന്റ് സ്കൂളില്നിന്ന് ജനക്കൂട്ടം കമ്പ്യൂട്ടറുകളും മറ്റ് വിലപിടിപ്പുള്ള വസ്തുക്കളും കൊള്ളയടിച്ചു, റോഡിന്റെ മറുവശത്ത് രാജധാനി സ്കൂളിന് മുന്നിലുള്ള അനില് സ്വീറ്റ്സിന്റെ കെട്ടിടം അഗ്നിക്കിരയാക്കി. കടയ്ക്കകത്ത് കുടുങ്ങിയിരുന്ന ജോലിക്കാരനായ ദില്ബാര് നേഗിയുടെ കത്തിക്കരിഞ്ഞ മൃതദേഹം പിന്നീട് പോലീസ് കണ്ടെത്തി തുടങ്ങിയ കാര്യങ്ങളും കുറ്റപത്രത്തിലുണ്ട്. ഐ.ബി ഉദ്യോഗസ്ഥന് അങ്കിത് ശര്മയെ കൊലപ്പെടുത്തിയതുമായും ശിവ്വിഹാറിലെ രാജധാനി സ്കൂളിന് സമീപം നടന്ന അക്രമങ്ങളുമായും ബന്ധപ്പെട്ട് രണ്ട് വീതം കുറ്റപത്രങ്ങളും അന്വേഷണസംഘം സമര്പ്പിച്ചിട്ടുണ്ട്.
ഫെബ്രുവരി 24 നാണ് ശിവ് വിഹാറിലെ രാജധാനി പബ്ലിക് സ്കൂളില് അക്രമങ്ങള് നടന്നത്. രാജധാനി സ്കൂളിന്റെ ടെറസില്നിന്ന് പെട്രോള് ബോംബുകള്, ആസിഡ്, ഇഷ്ടികകള്, കല്ലുകള്, മറ്റ് ആയുധങ്ങള് എന്നിവ കണ്ടെടുത്തുവെന്നും പോലീസ് പറയുന്നു. രാജധാനി സ്കൂളിലെ ടെറസില് നിന്ന് ഡിആര്പി കോണ്വെന്റ് സ്കൂളിലേക്ക് ഇറങ്ങാന് കലാപകാരികള് കയറുകള് ഉപയോഗിച്ചിരുന്നുവെന്നും തുടര്ന്ന് അക്രമികള് ഡിആര്പി സ്കൂളിന് തീകൊളുത്തുകയായിരുന്നുവെന്നും പോലീസ് ആരോപിക്കുന്നു. സാക്ഷികളില് ഡിആര്പി സ്കൂളിലെ കാവല്ക്കാരനും രാജധാനി സ്കൂളിലെ ഗാര്ഡും ഉള്പ്പെടുന്നു.
ആക്രമണം നടത്താന് ഫൈസല് ഫാറൂഖ് എന്നയാള് ഗൂഢാലോചന നടത്തിയെന്ന് പോലീസ് കണ്ടെത്തി. ഇയാള്ക്ക് തബലീഗ് ജമാഅത്ത് , പിഞ്ച്ര ടോഡ്, ജാമിയ കോഓര്ഡിനേഷന് കമ്മിറ്റി, ദയൂബന്ദ് ദാറുല് ഉലൂം തുടങ്ങി നിരവധി സംഘടനകളുമായി ബന്ധമുണ്ടെന്നും പോലീസ് വ്യക്തമാക്കി. പോപ്പുലര് ഫ്രണ്ട് ഓഫ് ഇന്ത്യ, ജാമിയ കോ-ഓര്ഡിനേഷന് കമ്മിറ്റി, നിസാമുദ്ദീന് മര്കസ്, ദയൂബന്ദ് എന്നിവയുടെ നേതാക്കളുമായും മൗലാനമാരുമായും ഫാറൂഖ് നടത്തിയ ഫോണ് കോളുകള് ഗൂഢാലോചനയുടെ ആഴം വര്ധിപ്പിക്കുന്നുവെന്നും പോലീസ് പറയുന്നു. കലാപം ആരംഭിക്കുന്നതിന് ഒരു ദിവസം മുമ്പ് ഫൈസല് ഫാറൂഖ് ദയൂബന്ദ് സന്ദര്ശിച്ചതായി കണ്ടെത്തിയിട്ടുണ്ടെന്നും പോലീസ് പറയുന്നു. കുറ്റപത്രത്തില് തബ്ലീഗ് ജമാഅത്തിന്റെ പേര് ഉള്പ്പെട്ടതിനെ കുറിച്ചുള്ള അന്വേഷണത്തിന് തങ്ങളെ ഔദ്യോഗികമായി അറിയിച്ചിട്ടില്ലെന്നായിരുന്നു തബ്ലീഗ് ജമാഅത്ത് അധികൃതര് പ്രതികരിച്ചത്.
