കാസര്കോട്: കോവിഡ് വ്യാപനത്തിന്റെ മൂന്നാംഘട്ടത്തില് കാസര്കോട് ജില്ലയില് രോഗികളുടെ എണ്ണത്തിലുണ്ടാകുന്ന വര്ദ്ധനവ് ഗൗരവത്തോടെ കാണണമെന്ന് ജില്ലാ മെഡിക്കല് ഓഫീസര് ഡോ. എ.വി രാംദാസ് അറിയിച്ചു. ജാഗ്രതയോടെ പ്രതിരോധപ്രവര്ത്തനങ്ങള് നടത്തിയില്ലെങ്കില് സമൂഹ വ്യാപന സാധ്യത തള്ളിക്കളയാനാവില്ലെന്ന് അദ്ദേഹം പറഞ്ഞു.
വിദേശത്തു നിന്നും ഇതര സംസ്ഥാനങ്ങളില് നിന്നുമുള്ള നമ്മുടെ ജില്ലക്കാരായ ആളുകളുടെ വരവോടുകൂടിയാണ് മൂന്നാംഘട്ട കോവിഡ് രോഗബാധ കൂടുതലായി റിപ്പോര്ട്ട് ചെയ്തു തുടങ്ങിയത്. ഈ കാലയളവില് വിദേശരാജ്യങ്ങളില് നിന്നും 646 പേരും ഇതര സംസ്ഥാനങ്ങളില് നിന്ന് 4976 പേരുമാണ് ജില്ലയിലേക്കെത്തിയത്.
മഹാരാഷ്ട്രയില് നിന്നുമാണ് ഏറ്റവും കൂടുതല് ആളുകള് നമ്മുടെ ജില്ലയിലേക്ക് വന്നു കൊണ്ടിരിക്കുന്നത്. ഇന്ത്യയില് തന്നെ ഏറ്റവും ഉയര്ന്ന രോഗനിരക്കുള്ള മഹാരാഷ്ട്രയില് നിന്നും ഇനിയും ധാരാളം ആളുകള് ജില്ലയിലേക്ക് എത്താന് കാത്തിരിക്കുകയാണ്. മൂന്നാംഘട്ട വ്യാപനത്തില് ആകെ റിപ്പോര്ട്ട് ചെയ്യപ്പെട്ട 81 രോഗികളില് 57 പേരും മഹാരാഷ്ട്രയില് നിന്നും വന്നവരാണെന്നത് കാര്യങ്ങളുടെ ഗൗരവം വര്ദ്ധിപ്പിക്കുന്നു.
മറ്റു ഇതര സംസ്ഥാനങ്ങള് ആയ കര്ണാടകയില് നിന്നും വന്ന ഒരാള്ക്കും തമിഴ്നാട്ടില് നിന്നും വന്ന 2 പേര്ക്കും വിദേശരാജ്യങ്ങളില് നിന്നും വന്ന 13 പേര്ക്കും ആണ് രോഗം സ്ഥിരീകരിച്ചിട്ടുള്ളത്. നിലവില് ഈ കാലയളവില് എട്ട് പേര്ക്ക് മാത്രമാണ് സമ്പര്ക്കത്തിലൂടെ രോഗ പകര്ച്ച ഉണ്ടായിട്ടുള്ളത്.
കാര്യക്ഷമമായ രീതിയില് സ്ഥാപനങ്ങളിലും വീട്ടു മുറികളിലും ഉള്ള നിരീക്ഷണം നടപ്പിലാക്കാന് കഴിഞ്ഞതുകൊണ്ടാണ് ഇതുവരെ രോഗ പകര്ച്ച തടഞ്ഞുനിര്ത്താന് കഴിഞ്ഞിട്ടുള്ളത്. എന്നാല് കൂടുതലായി ആളുകളെത്തുന്നതോടെ രോഗികളുടെ എണ്ണം വര്ധിക്കാന് സാധ്യതയുള്ളതിനാല് കര്ശനമായ ജാഗ്രത ആവശ്യമാണ്. ആരോഗ്യ വകുപ്പും ജില്ലാ ഭരണകൂടവും നിഷ്കര്ഷിക്കുന്ന രീതിയില് നിരീക്ഷണത്തില് കഴിയാന് മുഴുവനാളുകളും തയ്യാറാവുക എന്നുള്ളത് മാത്രമാണ് രോഗവ്യാപനം തടയാന് ഉള്ള പോംവഴി.
പുറത്ത് നിന്നെത്തുന്നവര് ആരോഗ്യവകുപ്പിന്റെ നിര്ദ്ദേശങ്ങള് പൂര്ണ്ണമായും അനുസരിക്കാനും നിരീക്ഷണത്തില് കഴിയാനും തയ്യാറാവണം. ഇവര് നിരീക്ഷണത്തില് കഴിയുന്നു എന്ന് കുടുംബാംഗങ്ങളും വാര്ഡുതല ജാഗ്രതാ സമിതികളും ഉറപ്പുവരുത്തേണ്ടതുണ്ട്.
ലോക്ക്ഡൗണ് ഇളവുകകളുടെ പശ്ചാത്തലത്തില് പൊതുയിടങ്ങളിലും കച്ചവട കേന്ദ്രങ്ങളിലുമൊക്കെ ആള്ക്കാര് കൂട്ടം കൂടുന്നതും സുരക്ഷാ മാനദണ്ഡങ്ങള് പാലിക്കാതിരിക്കുന്നതും രോഗവ്യാപന സാധ്യത വര്ധിപ്പിക്കുന്ന ഘടകങ്ങളാണ്. അനാവശ്യമായ യാത്രകള്, ആശുപത്രി സന്ദര്ശനങ്ങള് എന്നിവ ഒഴിവാക്കേണ്ടതും മാസ്ക് ധരിക്കല്, കൈകഴുകല് എന്നീ ശീലങ്ങള് ജീവിതത്തിന്റെ ഭാഗമാക്കാന് കഴിയണമെന്ന് ജില്ലാ മെഡിക്കല് ഓഫീസര് അറിയിച്ചു. ഒന്നും രണ്ടും ഘട്ടങ്ങളില് നാം ജാഗ്രതയോടുകൂടി നടത്തിയ പ്രവര്ത്തനങ്ങളുടെ തുടര്ച്ച മൂന്നാംഘട്ടത്തിലും ഉണ്ടാക്കിയെടുത്തില്ലെങ്കില് വലിയ തോതിലുള്ള സാമൂഹ്യവ്യാപനമാണുണ്ടാകുകയെന്നാണ് ആരോഗ്യ വകുപ്പ് ധികൃതര് പറയുന്നത്.
