കോട്ടയം : സംസ്ഥാനത്ത് ഒരു കോവിഡ് മരണം കൂടി. പത്തനംതിട്ട തിരുവല്ല സ്വദേശി ജോഷി(65) ആയിരുന്നു മരിച്ചത്. അബുദാബിയില് നിന്നും അടുത്തിടെ നാട്ടിലേക്ക് തിരിച്ചെത്തിയ ജോഷി കൊറോണ വൈറസ് രോഗം സ്ഥിരീകരിച്ചതിനെ തുടര്ന്ന് കോട്ടയം മെഡിക്കല് കോളേജില് ചികിത്സയില് കഴിയുകയായിരുന്നു.
പുലര്ച്ചെ രണ്ട് മണിയോടെ ആയിരുന്നു മരണം. അബുദാബിയില് നിന്ന് ഈ മാസം 11-നാണ് നാട്ടിലെത്തിയത്. കടുത്ത പ്രമേഹ രോഗി ആയിരുന്നു ഇദ്ദേഹം. 18-ാം തീയതി മുതല് പത്തനംതിട്ട ജില്ലാ ആശുപത്രിയില് ചികിത്സയിലായിരുന്നു ഇദ്ദേഹം. പിന്നീട് വിദഗ്ധ ചികിത്സയ്ക്ക് വേണ്ടിയാണ് ഈ മാസം 27-ാം തീയതി കോട്ടയം മെഡിക്കല് കോളേജ് ആശുപത്രിയില് എത്തിച്ചത്.
അബുദാബിയില് നിന്നെത്തിയ ഇദ്ദേഹം വീട്ടില് നിരീക്ഷണത്തിലായിരുന്നു. തുടര്ന്ന് നടത്തിയ പരിശോധനയിലാണ് ഇദ്ദേഹത്തിന് കൊവിഡ് സ്ഥിരീകരിക്കുന്നത്. ഇദ്ദേഹത്തെ പിന്നീട് ആശുപത്രിയിലേക്ക് ചികിത്സയിലേക്ക് മാറ്റി.
പ്രമേഹവും അമിതവണ്ണവും മൂലമാണ് അദ്ദേഹത്തിന് രോഗം ഭേദമാകാതിരുന്നതെന്ന് ഡോക്ടര്മാര് അറിയിച്ചു. 94 കിലോ ആയിരുന്നു അദ്ദേഹത്തിന്റെ ശരീരവണ്ണം.
അതേസമയം പ്രമേഹം കലശ്ശലായിരുന്നെന്ന് രോഗിക്കോ ബന്ധുക്കള്ക്കോ അറിവില്ലായിരുന്നു. കഴിഞ്ഞ ദിവസങ്ങളില് ആരോഗ്യ നിലയില് മാറ്റം വന്നിരുന്നെങ്കിലും വ്യാഴാഴ്ച രാത്രി രോഗം മൂര്ച്ഛിച്ചതോടെ ഇദ്ദേഹത്തെ വെിലേറ്ററിലേക്ക് മാറ്റുകയായിരുന്നു. മൃതദേഹം പത്തനംതിട്ടയിലേക്ക് കൊണ്ടുപോയി കൊവിഡ് പ്രോട്ടോക്കോള് പ്രകാരമാകും സംസ്കരിക്കുക.
