ന്യൂദല്ഹി:വ്യക്തിവിവരവും, വിലാസവും ഇലക്ട്രോണിക് അധിഷ്ഠിത ആധാര് പരിശോധനയിലൂടെ ഉറപ്പുവരുത്തി തല്സമയം പാന് അനുവദിക്കുന്നതിനുള്ള പദ്ധതിക്ക് കേന്ദ്ര ധനമന്ത്രി നിര്മ്മല സീതാരാമന് തുടക്കം കുറിച്ചു. മൊബൈല് നമ്പറുമായി ബന്ധിപ്പിച്ചിട്ടുള്ള സാധുവായ ആധാര് നമ്പര് കൈവശമുള്ള അപേക്ഷകര്ക്ക് തല്സമയ പാന് സൗകര്യം ഇപ്പോള് ലഭ്യമാണ്.
അപേക്ഷകര്ക്ക് ഇലക്ട്രോണിക് പാന് (ഇ-പാന്) സൗജന്യമായി ലഭിക്കുന്ന വിധത്തിലും കടലാസ് രഹിതവുമാണ് പാന് അനുവദിക്കുന്ന പ്രക്രിയ.തത്സമയ പാന് അനുവദിക്കുന്നതിനുള്ള സൗകര്യം ഉടന് ആരംഭിക്കുമെന്ന് 2020 ലെ കേന്ദ്ര ബജറ്റ് അവതരിപ്പിച്ചുകൊണ്ട് ധനമന്ത്രി നിര്മ്മല സീതാരാമന് അറിയിച്ചിരുന്നു.
ഈ മാസം 25 വരെയുള്ള കണക്കനുസരിച്ച്, ആകെ 50.52 കോടി നികുതിദായകര്ക്കാണ് പാന് അനുവദിച്ചിട്ടുള്ളത്.
തത്സമയ പാന് അപേക്ഷ നല്കുന്നതിനുള്ള പ്രക്രിയ വളരെ ലളിതമാണ്. തത്സമയ പാന് അപേക്ഷകര് ആദായനികുതി വകുപ്പിന്റെ ഇ-ഫയലിംഗ് വെബ്സൈറ്റില് പ്രവേശിച്ച് അവരവരുടെ സാധുവായ ആധാര് നമ്പര് നല്കണം. തുടര്ന്ന് ആധാറുമായി ബന്ധിപ്പിച്ചിട്ടുള്ള മൊബൈല് നമ്പറില് ലഭിച്ച ഒറ്റത്തവണ പാസ്വേഡ് അഥവാ ഒ.ടി.പി. സമര്പ്പിക്കണം. ഈ പ്രക്രിയ വിജയകരമായി പൂര്ത്തിയാക്കുമ്പോള്, 15 അക്ക അക്നോളേജ്മെന്റ് നമ്പര് അനുവദിക്കപ്പെടുന്നു. അപേക്ഷകരുടെ ആധാറുമായി ബന്ധിപ്പിച്ചിട്ടുള്ള ഇ-മെയിലിലേക്കും ഇ-പാന് അയക്കുന്നതായിരിക്കും
