ന്യൂദല്‍ഹി:ഭാരതത്തെ സ്‌നേഹിക്കുന്ന, ഭാരതീയതയെ സ്‌നേഹിക്കുന്ന യുവജനതയുടെ മനസ്സില്‍ വീരസവര്‍ക്കര്‍ പച്ച പിടിച്ചു നില്‍ക്കുന്ന ജ്വലിച്ചു നില്‍ക്കുന്ന ഓര്‍മ്മയാണെന്ന് പ്രജ്ഞാ പ്രവാഹ് അഖില ഭാരത സംയോജകന്‍ ജെ നന്ദകുമാര്‍. നിരന്തരം സവര്‍ക്കര്‍ വേട്ടയാടപ്പെട്ടു കൊണ്ടിരിക്കുമ്പോള്‍ നമ്മുടെ വിചാരത്തിന്റെ സമസ്ത മേഖലയിലും സവര്‍ക്കര്‍ ഒരു പുറന്തള്ളപ്പെട്ട വ്യക്തിത്വമായി അവഹേളിക്കപ്പെട്ടു കൊണ്ടിരിക്കുമ്പോഴും, ഇതിഹാസതുല്ല്യ ജീവിതം നയിച്ച ഉജ്ജ്വല വ്യക്തിത്വം വിനായക ദാമോദര്‍ സവര്‍ക്കറെ അറിയുകയും പഠിക്കുകയും ചെയ്യുന്ന പുതിയ തലമുറ കേരളത്തിലും ഉണ്ട് എന്നതിനു തെളിവാണ് ജന്മഭൂമി ലേഖനമത്സരത്തിനു കിട്ടിയ പ്രതികരണം. ജന്മഭൂമി ഓണ്‍ ലൈന്‍ നടത്തിയ ‘വീരേതിഹാസം’ ലേഖന മത്സരത്തിലെ വിജയികളെ പ്രഖ്യാപിക്കുകയായിരുന്നു അദ്ദേഹം. ലോക് ഡൗണ്‍ കാലത്ത് ജെ നന്ദകുമാര്‍ ചെയ്ത വീര സവര്‍ക്കര്‍ പ്രഭാഷണങ്ങളെ അടിസ്ഥാനപ്പെടുത്തിയാണ് മത്സരം സംഘടിപ്പിച്ചത്.
‘ലോക്‌ഡൗണില്‍ യാത്രകള്‍ മുടങ്ങിയപ്പോള്‍ ഫേസ്ബുക്ക് ലൈവായി വീരസവര്‍ക്കിന്റെ ജീവിതവും ദര്‍ശനവും ചര്‍ച്ച ചെയ്യാം എന്ന് തീരുമാനിച്ചു. രണ്ടോ മൂന്നോ ദിവസം കൊണ്ട് തീര്‍ക്കണം എന്നാലോചിച്ചിരുന്നെങ്കിലും അത് മുപ്പതു ദിവസം നീണ്ടു നിന്നു. എങ്കിലും പാരാവാരം പോലെ പരന്നു കിടക്കുന്ന സവര്‍ക്കറുടെ അത്യുജ്ജ്വലമായ ദര്‍ശനത്തിന്റെ ഒരറ്റത്തു മാത്രമേ എത്തിച്ചേരാന്‍ കഴിഞ്ഞിട്ടുള്ളൂ. അദ്ദേഹത്തിന്റെ ഹിമാലയ സദൃശമായ ധൈഷണിക ഔന്നത്യത്തിന്റെ ഒരു ചെറിയ പ്രദേശത്തു കൂടി കയറിയിറങ്ങി പോയി എന്നു മാത്രമേ പറയാന്‍ കഴിയൂ.
നിരന്തരം സവര്‍ക്കര്‍ വേട്ടയാടപ്പെട്ടു കൊണ്ടിരിക്കുമ്പോള്‍ നമ്മുടെ വിചാരത്തിന്റെ സമസ്ത മേഖലയിലും സവര്‍ക്കര്‍ ഒരു പുറന്തള്ളപ്പെട്ട വ്യക്തിത്വമായി അവഹേളിക്കപ്പെട്ടു കൊണ്ടിരിക്കുമ്പോഴും, ഭാരതത്തെ സ്‌നേഹിക്കുന്ന, ഭാരതീയതയെ സ്‌നേഹിക്കുന്ന യുവജനതയുടെ മനസ്സില്‍ സവര്‍ക്കര്‍ പച്ച പിടിച്ചു നില്‍ക്കുന്ന ജ്വലിച്ചു നില്‍ക്കുന്ന ഓര്‍മ്മയാണ് എന്ന് ലേഖന മല്‍സരത്തിന് കിട്ടിയ പ്രതികരണത്തില്‍ നിന്ന് മനസ്സിലായി. അതില്‍ വളരെയേറെ സന്തോഷവും അഭിമാനവും തോന്നുന്നു.’ ജെ നന്ദകുമാര്‍ പറഞ്ഞു.
മത്സരവിജയികള്‍
വിഷ്ണു അശോക് (സരസ്വതി ഭവനം, കൂരിക്കാട്, മാന്നാര്‍, ആലപ്പുഴ), അരുണ്‍ കീഴ്മഠം(അതുല്ല്യ, കള്ളിപ്പാടം,ഷൊര്‍ണൂര്‍, പാലക്കാട്), സുരേന്ദ്രന്‍ മക്കള്‍ വീട്ടില്‍( മൈത്രി നഗര്‍, പെരുന്ന, ചങ്ങനാശ്ശേരി) എന്നിവര്‍ യഥാക്രമം ആദ്യ മൂന്നു സ്ഥാനങ്ങള്‍ക്ക് അര്‍ഹരായി. 10000 രൂപ, 5000 രൂപ. 2500 രൂപ ക്രമത്തില്‍ കാഷ് അവാര്‍ഡും പ്രശംസാ പത്രവും സമ്മാനമായി നല്‍കും.
ആര്‍ ജയകൃഷ്ണന്‍ (ശ്രീരംഗം മരുത്തുറോഡ്, പെരുമ്പാവൂര്‍), ശരവണ്‍ ശശിധരന്‍( വടക്കേടത്ത്, മറ്റക്കര, കോട്ടയം), ശ്രീനിധി ബാല(തുറവൂര്‍,ആലപ്പുഴ), സതീശന്‍ ആലംതട്ടില്‍ (അമ്പാടി, രാമന്‍തളി, തിരുവില്വാംകുന്ന്, കണ്ണൂര്‍) എന്നിവര്‍ക്ക് 1000 രൂപ വീതം പ്രോത്സാഹന സമ്മാനവും ലഭിക്കും. ആദ്യ സ്ഥാനത്തു വന്ന 25 പേര്‍ക്ക് പ്രശംസാ പത്രവും നല്‍കുമെന്ന് മത്സരവിജയികളെ പ്രഖ്യാപിച്ചുകൊണ്ട് ജെ നന്ദകുമാര്‍ അറിയിച്ചു.
ശ്രീരാജ് ആര്‍.എസ്,വിപിന്‍ കാന്ത്,മേളത്തില്‍ കരുണാകരന്‍,ജ്യോതിസ് എസ്,ചന്ദ്രകുമാര്‍ ആര്‍,കെ ജിജിത,പ്രേം ഷൈലേഷ്,ബിന്ദു റെജി,ഗംഗ വൈഗമണി,സുന്ദരം ഗോവിന്ദ്,കൃഷ്ണശ്രീ ബാബു,സനിത സുരേഷ്,ഹരികൃഷ്ണന്‍ ജി.ടി.,ഹരീഷ് കെ,ബിജു മണി,ദീനദയാല്‍,മഞ്ജുനായക്,സംഗീത പിവി എന്നിവര്‍ക്കും പ്രശംസാ പത്രം ലഭിക്കും
പി.ശ്രീകുമാര്‍(എഡിറ്റര്‍, ജന്മഭൂമി ഓണ്‍ലൈന്‍), ശ്രീദത്തന്‍( എഡിറ്റര്‍, ഇന്‍ഡക്‌സ് സ്‌ക്രോള്‍സ് ,ദല്‍ഹി), ആര്‍ കൃഷ്ണകുമാര്‍(ഉത്തിഷ്ഠ, ബാംഗഌര്‍) അശോക് കുറുപ്പ് ( സംയോജകന്‍, വീര സവര്‍ക്കര്‍ മഞ്ച്, ജയ്‌പൂര്‍)എന്നിവരടങ്ങിയ സമിതിയാണ് ജേതാക്കളെ തെരഞ്ഞെടുത്തത്.
