മൂലമറ്റം: പവര്‍ഹൗസിന്റെ മുമ്പില്‍ നിന്ന് മൂര്‍ഖന്‍ പാമ്പിനെ പിടിക്കാന്‍ എത്തിയ വാവ സുരേഷിന്റെ മുമ്പില്‍ പെരുമ്പാമ്പ്. രണ്ടിനേയും വാവ സുരേഷ് പിടികൂടി. വ്യാഴാഴ്ച രാത്രിയാണ് സംഭവം പാമ്പിനെ കണ്ട വിവരം വനം വകുപ്പ് അധികൃതരെ അറിയിക്കുകയും അവര്‍ വാവ സുരേഷിനെ വിളിക്കുകയും ചെയ്തു.
അതനുസരിച്ച് മൂലമറ്റത്ത് എത്തിയ വാവ സുരഷ് പവര്‍ ഹൗസിനടുത്ത് എത്തിയപ്പോള്‍ വണ്ടിയുടെ മുമ്പിലേക്ക് കുറ്റിക്കാട്ടില്‍ നിന്നും പെരുമ്പാമ്പ് ചാടിവന്നു. അവിടെ വണ്ടി നിര്‍ത്തി പെരുമ്പാമ്പിനെ പിടിച്ച ശേഷം മൂര്‍ഖനേയും പിടികൂടി. മൂലമറ്റം സെക്ഷന്‍ ഫോറസ്റ്റ് ഓഫീസ് ജീവനക്കാരും വാവ സുരേഷിന് ഒപ്പം ഉണ്ടായിരുന്നു.
മൂര്‍ഖനെ പിടിക്കാന്‍ എത്തിയ വാവ സുരേഷ് പെരുമ്പാമ്പിനെയും പിടികൂടിയിട്ടാണ് മടങ്ങിയത്. പാമ്പുകളെ വനപാലകരെ ഏല്‍ല്പിച്ചു. 15 കിലോ തൂക്കം വരുന്നതാണ് പെരുമ്പാമ്പ്.രണ്ടിനേയും കുളമാവ് വനത്തില്‍ തുറന്ന് വിടുമെന്ന് വനപാലകര്‍ അറിയിച്ചു.
