കൊല്ലങ്കോട്: ഹൃദയാഘാതത്തെത്തുടര്ന്ന് മരിച്ച ഭാര്യയെ അവസാനമായി കാണുന്നതിന് നാട്ടിലെത്താന് കഴിയാതെ വിങ്ങിപ്പൊട്ടുകയാണ് പ്രവാസിയായ വിജയകുമാര്. ശനിയാഴ്ച ഉച്ചയ്ക്കാണ് വിജയകുമാറിന്റെ ഭാര്യ ഗീത (40) ഹൃദയാഘാതത്തെ തുടര്ന്ന് മരിച്ചത്. കൊറോണഭീതിയെ തുടര്ന്ന് മൃതദേഹം ജില്ലാശുപത്രിയിലേക്ക് മാറ്റി. തിങ്കളാഴ്ച കൊറോണ പരിശോധനഫലം നെഗറ്റീവ് ആണെന്ന് അധികൃതര് അറിയിച്ചു.
ഭാര്യ മരിച്ചത് അറിഞ്ഞതു മുതല് ദുബായ്യില് ഇലക്ട്രീഷ്യനായ വിജയകുമാര് നാട്ടിലെത്താനുള്ള തത്രപ്പാടിലായിരുന്നു. ഉടന് തന്നെ ഇന്ത്യന് എംബസി വെബ്സൈറ്റില് തന്റെ അവസ്ഥ വിശദമാക്കി പേര് രജിസ്റ്റര് ചെയ്തു. കഴിഞ്ഞ ദിവസം ദുബായ് രാജ്യാന്തര വിമാനത്താവളത്തില് നിന്ന് കൊച്ചിയിലേക്ക് പറന്ന എയര് ഇന്ത്യ എക്സ്പ്രസില് പോകാന് കഴിയുമെന്ന പ്രതീക്ഷയായിരുന്നു. എന്നാല്, സാധിച്ചില്ല. ഒടുവില് സുഹൃത്തിനെയും കൂട്ടി അബുദാബിയില് നേരിട്ട് ചെന്ന് എംബസി അധികൃതരെ കാര്യം ധരിപ്പിച്ചു.
തിങ്കളാഴ്ച വിമാനത്താവളത്തിലെത്തി ഇന്ത്യന് കോണ്സുലേറ്റ്, എയര് ഇന്ത്യ അധികൃതരോട് കാര്യം വ്യക്തമാക്കിയെങ്കിലും സീറ്റുണ്ടായിരുന്നില്ല. തന്റെ ദുരവസ്ഥയറിഞ്ഞ് ആരെങ്കിലും ഒരു സീറ്റ് ഒഴിയുമെന്ന് കരുതി വിമാനം പറന്നുപൊങ്ങുന്നതുവരെയും നിറകണ്ണുകളോടെ കാത്തുനിന്നെങ്കിലും കാര്യമുണ്ടായില്ല. 17ന് വൈകിട്ടുള്ള വിമാനത്തിലെ ഇനി എത്താന് കഴിയൂയെന്ന് ബന്ധുക്കള് അറിയിച്ചു. 18 വര്ഷം മുമ്പാണ് ഇവര് വിവാഹിതരായത്. മക്കളില്ല.
ജന്മഭൂമി ഓണ്ലൈന്