വയനാട്: കൊറോണയെന്ന മഹാമാരിയുടെ ആശങ്കകള്‍ക്കിടയിലും അക്രമവും ക്രൂരതയും കൈമുതലാക്കി സിപിഎം പ്രവര്‍ത്തകര്‍ അഴിഞ്ഞാടുന്നു. ഇക്കഴിഞ്ഞ വെള്ളിയാഴ്ച വയനാട് മാനന്തവാടിക്കടുത്ത് മുതിരേരിയില്‍ യുവതികള്‍ക്കും പിതാവിനും നേരെയുണ്ടായ അക്രമമാണ് സിപിഎം അഴിഞ്ഞാട്ടത്തിന്റെ ഏറ്റവും പുതിയ തെളിവ്.
വീടിനടുത്തെ പുഴയില്‍ കുളിക്കാനിറങ്ങിയ മകളേയും കൂട്ടുകാരിയേയും അപമാനിച്ചത് ചോദ്യം ചെയ്തതിന് സിപിഎം പ്രവര്‍ത്തകരായ അഞ്ചംഗ സംഘം പിതാവിന്റെ പല്ലടിച്ച് കൊഴിച്ചു. മൊബൈലില്‍ ദൃശ്യങ്ങളെടുത്തും മറ്റുമാണ് ഇവര്‍ യുവതികളെ അപമാനിച്ചത്.
സിപിഎം പ്രവര്‍ത്തകരുടെ അക്രമത്തെ തുടര്‍ന്ന് പരിക്കേറ്റ യുവതിയുടെ പിതാവിനെ മാനന്തവാടിയിലെ സ്വകാര്യ ആശുപത്രിയില്‍ പ്രവേശിപ്പിച്ചെങ്കിലും ലോക്ക് ഡൗണായതിനാല്‍ വീട്ടില്‍ വിശ്രമിക്കാനായിരുന്നു നിര്‍ദേശം. സംഭവം നടന്നതിന്റെ പിറ്റേന്ന് പോലീസെത്തി മൊഴിയെടുത്തു. വീണ്ടും ഒരുദിവസത്തിന് ശേഷമാണ് പെണ്‍കുട്ടികളുടെ മൊഴി പോലീസ് രേഖപ്പെടുത്തിയത്.
സിപിഎം പ്രവര്‍ത്തകരായ അഞ്ച് പേര്‍ക്കുമെതിരെ ജാമ്യമില്ലാ കുറ്റം ചുമത്തിയെന്നും പ്രതികള്‍ക്കായി തിരച്ചില്‍ തുടരുകയാണെന്നുമാണ് മാനന്തവാടി പോലീസിന്റെ വിശദീകരണം. സംഭവത്തില്‍ സംസ്ഥാന വനിതാ കമ്മീഷന്‍ സ്വമേധയാ കേസെടുത്തിട്ടുണ്ട്.
അതേസമയം, ഒളിവില്‍ പോയ പ്രതികളെ സംരക്ഷിക്കാനാണ് പോലീസ് ശ്രമിക്കുന്നതെന്നും ഇതിന് പിന്നില്‍ ഒത്തുകളിയുണ്ടെന്നുമാണ് കുടുംബത്തിന്റെ വിമര്‍ശനം.
