കൊല്‍ക്കത്ത : കോവിഡ് ബംഗാളില്‍ വ്യാപകമാകുന്നതായി സൂചന. വൈറസ് ബാധ ആരോഗ്യ പ്രവര്‍ത്തകരിലേക്കും വ്യാപിക്കാന്‍ തുടങ്ങിയതോടെ ആശുപത്രി അടച്ചതായി റിപ്പോര്‍ട്ട്. കൊല്‍ക്കത്തയില്‍ മികച്ച സൗകര്യങ്ങളോടുകൂടി പ്രവര്‍ത്തിച്ചിരുന്ന ആശുപത്രിയാണ് ഇത്തരത്തില്‍ പൂട്ടേണ്ടി വന്നത്. ഇതോടെ സംസ്ഥാനത്തെ സാഹചര്യങ്ങള്‍ സംബന്ധിച്ച് മമത സര്‍ക്കാര്‍ ഇതുവരെ യാഥാര്‍ത്ഥ്യം മറച്ചുവെയ്‌ക്കുകയായിരുന്നു എന്നാണ് തെളിവുകള്‍ പലതും സൂചിപ്പിക്കുന്നത്.
സംസ്ഥാനത്ത് പൂട്ടേണ്ടി വന്ന പീയര്‍ലെസ് എന്ന ആശുപത്രിയിലെ 10 ഓളം ഡോക്ടര്‍മാര്‍ക്കും 70 നടുത്ത് നഴ്സുമാര്‍ക്കും 30നടുത്ത് ശുചീകരണ പ്രവര്‍ത്തകര്‍ക്കും കൊറോണ ബാധിച്ചതായാണ് ദേശീയ മാധ്യമങ്ങളാണ് റിപ്പോര്‍ട്ട് പുറത്തുവിട്ടത്. സംസ്ഥാനത്തെ പ്രധാന കോവിഡ് ചികിത്സാ കേന്ദ്രം കൂടിയായിരുന്നു ഇത്. ഇവിടുത്തെ 10 ഡോക്ടര്‍മാര്‍ക്കെങ്കിലും രോഗബാധയുണ്ടായിരിക്കുമെന്നാണ് പേരു വെളിപ്പെടുത്താനാഗ്രഹിക്കാത്ത ഒരു ഡോക്ടര്‍ വെളിപ്പെടുത്തിയത്. തിങ്കളാഴ്ചയാണ് ആശുപത്രി അടച്ചുപൂട്ടിയത്.
ഇതോടെ ആശുപത്രിയിലെ രോഗികളെല്ലാം ഭീതിയിലാണ്. ആരോഗ്യ പ്രവര്‍ത്തകരില്ലാത്തതിനാല്‍ ചികിത്സ മുടങ്ങി. ആശുപത്രി ജീവനക്കാര്‍ കൊറോണ ബാധിച്ചതിനാല്‍ അതേ ആശുപത്രിയില്‍ തന്നെ പ്രവേശിപ്പിക്കപ്പെട്ടതോടെ വേണ്ടത്ര ജോലിക്കാരിലില്ലാതെ വന്നതോടെ രോഗികളെ മറ്റ് ആശുപത്രികളിലേക്ക് മാറ്റി കഴിഞ്ഞു. അതേസമയം ഇവരേയും പരിശോധനകള്‍ക്ക് വിധേയമാക്കേണ്ടതായുണ്ട്.
ആരോഗ്യപ്രവര്‍ത്തകര്‍ക്ക് കൊറോണ ബാധിച്ചതുമൂലം അടച്ചുപൂട്ടേണ്ടിവന്ന സംസ്ഥാനത്തെ രണ്ടാമത്തെ സ്വകാര്യ ആശുപത്രിയാണ് പീയര്‍ലെസ്. സംസ്ഥാനത്ത് ഇതുവരെ 100 ആരോഗ്യപ്രവര്‍ത്തകര്‍ കൊറോണ ബാധിച്ച് ചികിത്സയിലാണെന്നാണ് ആരോഗ്യവകുപ്പിന്റെ അറിയിപ്പ്. എന്നാല്‍ മെയ് 1ന് സംസ്ഥാനത്ത് ഒരു ദിവസം 8 പേര്‍ കൊറോണ ബാധിച്ച് മരിച്ചതോടെ എല്ലാ സ്വകാര്യ ആശുപത്രികളോടും കൊറോണ രോഗികളെ അടിയന്തിരമായി ചികിത്സിക്കണമെന്ന നിര്‍ദ്ദേശം നല്‍കിയതോടെയാണ് സംസ്ഥാനത്തെ കോവിഡ് ഏറെ പ്രതിസന്ധിയില്‍ ആക്കിയതായി റിപ്പോര്‍ട്ട് പുറത്തുവന്നത്.
അതേസമയം വിഷയത്തില്‍ മമത സര്‍ക്കാരിനെതിരെ രൂക്ഷ വിമര്‍ശനങ്ങളാണ് ഉയരുന്നത്. ലോക്ഡൗണ്‍ കര്‍ശ്ശനമായി നടപ്പാക്കാന്‍ സംസ്ഥാന സര്‍ക്കാരിന് ആയില്ലെന്നതാണ് പരാതി ഉയരുന്നത്. കൂടാതെ കോവിഡ് പ്രതിരോധ പ്രവര്‍ത്തനങ്ങള്‍ ആദ്യഘട്ടത്തില്‍ നടപ്പാക്കുന്നതില്‍ മമത പരാജയം ആയിരുന്നെന്നും ആരോപണമുണ്ട്.
