കോട്ടയം: ലോക്ഡൗണിനെ തുടര്ന്ന് കേന്ദ്ര സര്ക്കാര് പ്രഖ്യാപിച്ച പ്രധാനമന്ത്രി കല്യാണ് അന്നയോജന പദ്ധതി പ്രകാരം ഈ മാസം അന്ത്യോദയ, മുന്ഗണന വിഭാഗങ്ങള്ക്ക് ആളൊന്നിന് അഞ്ച് കിലോ അരിക്കൊപ്പം കാര്ഡൊന്നിന് ഒരു കിലോ കടലയും നല്കും. ഇതനുസരിച്ച് സംസ്ഥാനത്ത് 1.54 കോടി പേര്ക്ക് ആനുകൂല്യം ലഭിക്കും. മൂന്ന് മാസത്തേക്കാണ് കേന്ദ്ര സര്ക്കാര് സൗജന്യ റേഷന് പ്രഖ്യാപിച്ചത്. അരിക്കൊപ്പം വിതരണം ചെയ്യാനുള്ള കടല റേഷന് കടകളിലെത്തിച്ചു. സംസ്ഥാനത്തിന് അനുവദിച്ച അരി ഈ ആഴ്ചയെത്തും. അതേസമയം, സംസ്ഥാന സര്ക്കാരിന്റെ സൗജന്യ റേഷന് ഈ മാസമുണ്ടാകില്ല. എഎവൈ (മഞ്ഞ കാര്ഡ്), മുന്ഗണന വിഭാഗങ്ങള്ക്ക് (പിങ്ക് കാര്ഡ്) പതിവുപടിയുള്ള റേഷന് മാത്രമേ ഉണ്ടാകൂ.
കഴിഞ്ഞ മാസം എല്ലാ വിഭാഗത്തിനും സൗജന്യ റേഷന് അനുവദിച്ചത് സംസ്ഥാന സര്ക്കാരിന് ബാധ്യതയായി. ഇതോടെ റേഷന് വിഹിതം ഏറ്റവും കുറച്ച് വാങ്ങുന്ന നോണ് സബ്സിഡിക്കാര്ക്ക് (വെള്ള കാര്ഡുകാര്ക്ക്) അടുത്ത മാസം റേഷന് കടകള് വഴി കൂടിയ വിലയ്ക്ക് കൂടുതല് അരി നല്കുന്നതിനെക്കുറിച്ചാണ് ആലോചന. സാധാരണ റേഷന് വിഹിതമായി ഈ വിഭാഗങ്ങള്ക്ക് രണ്ട് കിലോ മാത്രമാണുള്ളത്. കേന്ദ്ര സര്ക്കാര് 22 രൂപയ്ക്ക് അനുവദിച്ച അരി കൂടുതല് വിലയ്ക്ക് വില്ക്കുന്നതിനെക്കുറിച്ചാണ് സംസ്ഥാനം ആലോചിക്കുന്നത്.
സംസ്ഥാന സര്ക്കാരിന്റെ പക്കല് അരിയില്ല
ഈ മാസം സൗജന്യ റേഷന് സംസ്ഥാന സര്ക്കാരിന്റെ പക്കല് അരിയില്ല. മെയ്, ജൂണ് മാസങ്ങളിലെ വിഹിതം മുന്കൂറായി എടുത്താണ് സംസ്ഥാനം സൗജന്യ അരി നല്കിയത്. ഒടിപി മുഖേനയല്ലാതെ റേഷന് വിതരണം ചെയ്തതിനാല് സാധാരണ റേഷന് വാങ്ങുന്നതിനെക്കാളും 15 മുതല് 20 ശതമാനം വരെ അരി വാങ്ങി. ചില റേഷന് കടകളില് 98 ശതമാനത്തിന് മുകളിലായിരുന്നു വിതരണം. വിദേശത്തുള്ളവരുടെയും സ്ഥലത്തില്ലാത്തവരുടെയും കാര്ഡുകള് ഉപയോഗിച്ച്
റേഷന് വാങ്ങിയിട്ടുണ്ടെന്നാണ് സംശയം. അതിനാല് ഈ മാസത്തേക്കുള്ള സാധാരണ റേഷന് വിഹിതം നല്കാന് സബ്സിഡി അരി ഇല്ലാത്ത അവസ്ഥയിലെത്തി. ഇത് പരിഹരിക്കാന് കൂടിയ വിലയ്ക്ക് 50,000 ടണ് അരി വാങ്ങി. അതേസമയം, കേന്ദ്രത്തിന്റെ സൗജന്യറേഷന് മൂന്ന് മാസത്തേക്ക് മൂന്കൂറായി 2.32 ലക്ഷം മെട്രിക് ടണ് അരി അനുവദിച്ചു. ഇതുമൂലം കേന്ദ്രത്തിന്റെ റേഷന് വിതരണം തടസ്സമില്ലാതെ മുന്നോട്ടുപോകും.
ജന്മഭൂമി ഓണ്ലൈന്