കോഴിക്കോട്: ജില്ലയില് കോവിഡ് സ്ഥിരീകരിച്ച് ചികിത്സയിലായിരുന്ന നാല് പേര് കൂടി ഇന്നലെ രോഗമുക്തി നേടിയതോടെ കോഴിക്കോട് ജില്ല പൂര്ണ കോവിഡ് മുക്ത ജില്ലയായി. കോടഞ്ചേരി മൈക്കാവ് സ്വദേശിനിയായ നഴ്സ് , കോഴിക്കോട് മെഡിക്കല് കോളജിലെ രണ്ട് ഹൗസ് സര്ജന്മാര്, കോഴിക്കോട് മെഡിക്കല് കോളജ് ഹയര് സെക്കന്ററി സ്കൂളിലെ അഗതി ക്യാമ്പിലെ തമിഴ്നാട് സ്വദേശി എന്നിവരാണ് ഇന്നലെ രോഗമുക്തരായത്.
ഇതോടെ ജില്ലയില് കോവിഡ് സ്ഥിരീകരിച്ച് ചികിത്സയിലായിരുന്ന എല്ലാവരും രോഗമുക്തരായി. എല്ലാവരെയും രോഗമുക്തരാക്കാനായത് കോഴിക്കോട് മെഡിക്കല് കോളേജിന് മികച്ച നേട്ടമായി. ഇതുകൂടാതെ കഴിഞ്ഞ 11 ദിവസമായി ജില്ലയില് ഒരു പോസിറ്റീവ് കേസും റിപ്പോര്ട്ട് ചെയ്യപ്പെട്ടിട്ടില്ലെന്നതും ജില്ലക്ക് ആശ്വാസമായി. കോഴിക്കോട് 20 മാധ്യമ പ്രവര്ത്തകരുടെ സ്രവ സാംപിളുകളുടെ പരിശോധനാ ഫലവും നെഗറ്റീവാണ്.
ഇന്നലെ 70 പേര് കൂടി വീടുകളില് നിരീക്ഷണം പൂര്ത്തിയാക്കി. ജില്ലയില് ഇതുവരെ 22,465 പേര് നിരീക്ഷണം പൂര്ത്തിയാക്കിയതായി ജില്ലാ മെഡിക്കല് ഓഫീസര് ഡോ. ജയശ്രീ വി. അറിയിച്ചു. ഇപ്പോള് ജില്ലയില് 1029 പേര് നിരീക്ഷണത്തില് ഉണ്ട്. പുതുതായി വന്ന 6 പേര് ഉള്പ്പെടെ 30 പേരാണ് ആശുപത്രിയില് നിരീക്ഷണത്തിലുള്ളത്. ഇന്നലെ 103 സ്രവ സാംപിള് പരിശോധനയ്ക്ക് അയച്ചിട്ടുണ്ട്. ആകെ 2015 സ്രവ സാംപിളുകള് പരിശോധനയ്ക്ക് അയച്ചതില് 1867 എണ്ണത്തിന്റെ ഫലം ലഭിച്ചു. ഇതില് 1833 എണ്ണം നെഗറ്റീവ് ആണ്. പരിശോധനയ്ക്കയച്ച സാമ്പിളുകളില് 178 പേരുടെ പരിശോധനാ ഫലം കൂടി ലഭിക്കാനുണ്ട്.
