ന്യൂദല്‍ഹി : കോവിഡ് പ്രതിരോധ പ്രവര്‍ത്തനങ്ങള്‍ക്ക് ആദരവായി സൈന്യത്തിന്റെ ഫ്‌ളൈപാസ്റ്റ് ഇന്ന്. ശ്രീനഗര്‍ മുതല്‍ തിരുവനന്തപുരം വരെയുള്ള വ്യോമസേനയുടെ വിമാനങ്ങള്‍ പറന്നിറങ്ങി കോവിഡ് ചികിത്സാ ആശുപത്രികള്‍ക്കുമേല്‍ പൂക്കള്‍ വിതറും.
കോവിഡ് പ്രതിരോധ നടപടികളില്‍ ആരോഗ്യ പ്രവര്‍ത്തകര്‍ക്കുള്ള ആദരവ് അറിയിച്ചുകൊണ്ടാണ് ഈ നടപടി. രാവിലെ ഒമ്പതര മണിക്ക് പോലീസുകാര്‍ക്ക് ആദരമര്‍പ്പിച്ച് ദല്‍ഹിയിലെ പോലീസ് സ്മാരകത്തില്‍ സേനേമേധാവികള്‍ പുഷ്പചക്രം അര്‍പ്പിക്കുന്നതോടെയാണ് ഫ്‌ളൈപാസ്റ്റ് തുടങ്ങുന്നത്.
ശ്രീനഗറില്‍ നിന്ന് തിരുവനന്തപുരം വരെയും അസമില്‍ നിന്ന് ഗുജറാത്തിലെ കച്ചുവരെയും വിമാനങ്ങള്‍ പറക്കും. ഫ്‌ളൈപാസ്റ്റിനെ സ്വാഗതം ചെയ്യുന്നതായി പ്രധാനമന്ത്രി നരേന്ദ്രമോദി അറിയിക്കുകയും ചെയ്തു. കോവിഡ് പോരാട്ടത്തിന്റെ ഭാഗമായ എല്ലാ ആരോഗ്യ പ്രവര്‍ത്തകരെയും അവരുടെ കുടുംബാംഗങ്ങളെയും രാജ്യം ആദരിക്കുകയും ബഹുമാനിക്കുകയും ചെയ്യുന്നതായും മോദി പറഞ്ഞു.
വ്യോമസേനയുടെ ട്രാന്‍സ്‌പോര്‍ട്ട് വിമാനങ്ങളും മിഗ് 21, മിഗ് 27 യുദ്ധവിമാനങ്ങളും ഫ്‌ളൈപാസ്റ്റില്‍ പങ്കെടുക്കുന്നുണ്ട്. കോവിഡ് ആശുപത്രികള്‍ക്കുമേല്‍ പൂക്കള്‍ വിതറാന്‍ ഹെലിക്കോപ്റ്ററുകള്‍ പറക്കും. ദീപങ്ങള്‍ കൊണ്ട് അലങ്കരിച്ച് നാവിക സേന കപ്പലുകളും, ബാന്റ് സംഘങ്ങളുമായി കരസേനയും ചടങ്ങിന്റെ ഭാഗമാകും.
കൊച്ചിയില്‍ ദക്ഷിണ നാവികാസ്ഥാനത്തിന്റെ നേതൃത്വത്തിലാണ് ചടങ്ങുകള്‍ നടത്തുന്നത്. രാവിലെ പത്തിന് നാവികസേനയിലെ മുതിര്‍ന്ന ഉദ്യോഗസ്ഥര്‍ എറണാകുളം ജനറല്‍ ആശുപത്രിയിലെത്തി ജില്ലാ കളക്ടര്‍, ഡോക്ടര്‍മാര്‍, നഴ്‌സുമാര്‍, മറ്റ് ആരോഗ്യപ്രവര്‍ത്തകര്‍ എന്നിവരെ അനുമോദിക്കും.
നാവികസേനയുടെ ആദരസൂചകമായി ചേതക് ഹെലികോപ്ടര്‍ ആശുപത്രിക്ക് മുകളില്‍ പുഷ്പവൃഷ്ടി നടത്തും. തുടര്‍ന്ന് 10.30 ന് ഡോര്‍ണിയര്‍ വിമാനങ്ങളും സീ കിങ് ഉള്‍പ്പെടെയുള്ള ഹെലികോപ്ടറുകളും മറ്രൈന്‍ ഡ്രൈവിന് മുകളിലൂടെ പറന്ന് ആദരമര്‍പ്പിക്കും.
