കൊല്ക്കത്ത: പ്രശസ്ത ഇന്ത്യന് ഫുട്ബോള് താരം ചുനി ഗോസ്വാമി അന്തരിച്ചു. കൊല്ക്കത്തയില് വ്യാഴാഴ്ച വൈകുന്നേരം അഞ്ച് മണിയോടെ ഹൃദയസ്തംഭനത്തെ തുടര്ന്നായിരുന്നു അന്ത്യം. 82 വയസ്സായിരുന്നു. 1962-ല് ഏഷ്യന് ഗെയിംസില് സ്വര്ണം നേടിയ ടീമിന്റെ ക്യാപ്റ്റനായിരുന്നു അദ്ദേഹം.
ചുനി ഗോസ്വാമിയുടെ അന്താരാഷ്ട്ര കരിയര് ആരംഭിക്കുന്നത് 1957ല് ആണ്. 1964 വരെയുള്ള കാലത്ത് ഇന്ത്യക്കുവേണ്ടി50 മാച്ചുകള് കളിച്ചിട്ടുണ്ട്.മോഹന് ബഗാനുവേണ്ടിയും അദ്ദേഹം ബൂട്ടണിഞ്ഞിട്ടുണ്ട്.
ഏഷ്യന് ഗെയിംസില് 1964ലെ ടൂര്ണമെന്റില് ചുനി ഗോസ്വാമിയുടെ നേതൃത്വത്തില് ഇന്ത്യ റണ്ണേഴ്സ് അപ് ആവുകയും ചെയ്തിരുന്നു. ബര്മയ്ക്കെതിരെയാണ് അന്ന് ഇന്ത്യ ഫൈനലില് പരാജയപ്പെട്ടത്. 1964ല് 27-ാം വയസ്സില് അന്താരാഷ്ട്ര ഫുട്ബോളില് നിന്ന് വിരമിച്ചു.
ക്രിക്കറ്റ് താരവുമായിരുന്നു ചുനി ഗോസ്വാമി. ഫസ്റ്റ് ക്ലാസ് ക്രിക്കറ്റില്1962 മുതല് 1973 വരെയുള്ള കാലത്ത് ബംഗാളിനുവേണ്ടി കളിച്ചിട്ടുണ്ട്. 1966ല് വെസ്റ്റ് ഇന്ഡീസ് ടീമിനെ തോല്പിച്ച ഈസ്റ്റ് സോണ് ടീമില് അംഗമായിരുന്നു. ഈ ടൂര്ണമെന്റില് അദ്ദേഹം എട്ട് വിക്കറ്റ് നേടിയിരുന്നു. 1971-72 കാലത്ത് ബംഗാള് രഞ്ജി ടീമിന്റെ ക്യാപ്റ്റനായിരുന്നു.
