ന്യൂദല്ഹി: കൊറോണ(കൊവിഡ് 19) വൈറസ് ബാധയ്ക്കെതിരായ പോരാട്ടം അന്യസംസ്ഥാന തൊഴിലാളികള് തെരുവിലിറങ്ങതിലൂടെ ദുര്ബലപ്പെടുമെന്നും അനിഷ്ട സംഭവങ്ങള് ഉണ്ടാകാതിരിക്കാന് സംസ്ഥാന സര്ക്കാരുകള് ശ്രദ്ധിക്കണമെന്നും കേന്ദ്ര ആഭ്യന്തരമന്ത്രി അമിത് ഷാ. മഹാരാഷ്ട്രയിലെ ബാന്ദ്രയില് ഇന്നലെ ആയിരക്കണക്കിന് തൊഴിലാളികള് തെരുവിലിറങ്ങിയിരുന്നു. ഈ സാഹചര്യത്തിലാണ് കേന്ദ്ര ആഭ്യന്തര മന്ത്രാലയത്തിന്റെ മുന്നറിയിപ്പ്.
മഹാരാഷ്ട്രയില് അന്യസംസ്ഥാന തൊഴിലാളികള് തെരുവിലിറങ്ങിയതുമായി ബന്ധപ്പെട്ട വിഷയത്തില് മുഖ്യമന്ത്രി ഉദ്ദവ് താക്കറെയെ ഫോണില് വിളിച്ച് അമിത് ഷാ ആശങ്ക രേഖപ്പെടുത്തിയിരുന്നു. സര്ക്കാരിനാവശ്യമായ എല്ലാ പിന്തുണയും കേന്ദ്രം നല്കുമെന്നും അദ്ദേഹം പറഞ്ഞു.
ആയിരത്തിലധികം തൊഴിലാളികളാണ് ബാന്ദ്ര റെയില്വെ സ്റ്റേഷനു സമീപം തടിച്ചു കൂടിയത്. ലോക്ഡൗണ് മെയ് മൂന്നു വരെ നീട്ടുകയാണെന്ന് പ്രധാനമന്ത്രി അറിയിച്ച് മണിക്കൂറുകള്ക്കു ശേഷമാണ് തൊഴിലാളികള് സംഘടിച്ചത്. സ്വന്തം നാട്ടിലേക്കു തിരികെ പോകാന് യാത്രാസൗകര്യം ഒരുക്കണമെന്നായിരുന്നു ഇവരുടെ പ്രധാന ആവശ്യം. ബംഗാള്, ബിഹാര്, ജാര്ഖണ്ഡ്, ഉത്തര്പ്രദേശ് എന്നിവിടങ്ങളില് നിന്നുള്ളവരാണ് തൊഴിലാളികളില് ഏറെയും.
അതേസമയം 14നു ശേഷം ട്രെയിന് ഗതാഗതം പുനരാരംഭിക്കുമെന്നും തിരികെ നാട്ടില് പോകാന് സാധിക്കുമെന്നുമാണ് തൊഴിലാളികള് കരുതിയിരുന്നതെന്ന് ഉദ്ദവ് താക്കറെ പറഞ്ഞു. ഭക്ഷണവും താമസവും നല്കാമെന്ന് ഉറപ്പു നല്കിയതോടെയാണ് തൊഴിലാളികള് മടങ്ങിയതെന്ന് പോലീസ് അധികൃതര് പറഞ്ഞു.
