ന്യൂദല്ഹി: കൊറോണ(കൊവിഡ് 19) വൈറസ് മൂലം ഉണ്ടാകുന്ന പ്രത്യാഘാതങ്ങളെ ഒരു പരിധി വരെ പ്രതിരോധിക്കാനായെന്നും ഇതിന് കാരണം എല്ലാ ജനങ്ങളുടെയും ത്യാഗമാണെന്നും പ്രധാനമന്ത്രി നരേന്ദ്ര മോദി. രാജ്യത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.
നിങ്ങളുടെ ത്യാഗം രാജ്യത്തെ രക്ഷിക്കുകയാണ്. നിങ്ങള്ക്ക് എത്രത്തോളം ബുദ്ധിമുട്ടുണ്ടാകുന്നുണ്ടെന്ന് എനിക്ക് മനസിലാകന്നുണ്ട്, പലരും വീട്ടില് നിന്ന് അകന്ന് നില്ക്കുകയാണ്, ഭക്ഷണം, വെള്ളം എന്നിവക്ക് പോലും ബുദ്ധിമുട്ടിയാണ് രാജ്യത്തിനു വേണ്ടി ജനങ്ങള് പോരാടിയത്. ബാബ സാഹേബ് അംബേദ്കര് നമുക്ക് നല്കിയ ഊര്ജവും പ്രചോദനവും ആണ് ഭാരതീയര് ഈ കാലത്തു കാട്ടിയത്. അതിനാല് എല്ലാ ഭാരതീയര്ക്കും വേണ്ടി അംബേദ്ക്കറെ ഞാന് നമിക്കുന്നു.
വിഷു അടക്കം എല്ലാ ആഘോഷങ്ങളും നിയന്ത്രണങ്ങള് പാലിച്ചു ആഘോഷിച്ച എല്ലാവര്ക്കും നന്ദി അറിയിക്കുന്നു. ഒരു പട്ടാളക്കാരനെ പോലെ ദൗത്യം നിര്വഹിക്കുന്ന നിങ്ങളെയെല്ലാവരെയും അദരപൂര്വ്വം നമിക്കുന്നുവെന്നും മോദിജി വ്യക്തമാക്കി.
150 കൊവിഡ് കേസ് ഉള്ളപ്പോഴാണ് രാജ്യത്ത് 21 ദിവസം ലോക്ക് ഡൗണ് പ്രഖ്യാപിച്ചത്. മറ്റു രാജ്യങ്ങളുമായി താരതമ്യം ചെയ്യുന്നത് ശരി അല്ലെങ്കിലും ചില സത്യങ്ങള് പറഞ്ഞെ പറ്റൂ. ലോകത്തെ വലിയ രാജ്യങ്ങളെക്കാള് കൊവിഡ് പിടിച്ചു കെട്ടുന്നതില് ഇന്ത്യ വളരെ മുന്നിലാണ്. ഉചിതമായ സമയത്ത് തീരുമാനം എടുത്തത് കൊണ്ടാണ് മരണ സംഖ്യ വലിയ രീതിയില് ഉയരാതെ പിടിച്ചു നിര്ത്തിയത്. സാമൂഹിക അകലം എന്നത് തന്നെ ആണ് വിജയകരമായത്. അതുകൊണ്ടാണ് ലോക രാഷ്ട്രങ്ങള് ഇന്ത്യ എന്ന പേര് ഇപ്പോഴും പറയുന്നത്. അതില് സംസ്ഥാന സര്ക്കാരുകള് പൂര്ണമായി സഹകരിച്ചു. ഇന്ത്യയുടെ അച്ചടക്കം ആഗോള മാതൃക ആയി മാറി.
എന്നാല്, കൊവിഡ് എന്ന മഹാമാരി പിടിച്ചു നിര്ത്താന് ഇനിയും ലോക്ക് ഡൗണ് നീട്ടണം. മെയ് മൂന്ന് വരെ ലോക്ക് ഡൗണ് നീട്ടിയെ മതിയാകൂ. കൊവിഡ് ഇനി പുതിയ സ്ഥലങ്ങളിലേക്ക് പകരാന് അനുവദിക്കരുത്. ഹോട് സ്പോട് ആയി കണ്ടെത്തിയ സ്ഥലങ്ങളില് നിയന്ത്രണം വര്ധിപ്പിക്കണം. ഏപ്രില് 20 വരെ കര്ശന നിയന്ത്രണമേര്പ്പെടുത്തമെന്നും ഈ കാലയളവില് ഹോട് സ്പോട് ആയി പ്രഖ്യാപിച്ച സ്ഥലങ്ങളില് രോഗം വര്ധിക്കാതെ വന്നാല് അത്തരം സ്ഥലങ്ങളില് ഇളവ് അനുവദിക്കുമെന്നും അദ്ദേഹം പറഞ്ഞു.
