മുംബൈ: കൊറോണ വൈറസ് വ്യാപകമാകുന്ന പശ്ചാത്തലത്തില്‍ രോഗത്തെ തടയാന്‍ അക്ഷീണം പ്രയത്‌നിക്കുന്ന ആരോഗ്യപ്രവര്‍ത്തകര്‍ക്ക് താമസ സൗകര്യമൊരുക്കാന്‍ തയ്യാറാണെന്ന വാഗ്ദാനവുമായി താജ് ഹോട്ടലുകള്‍. രാജ്യം കടുത്ത പ്രതിസന്ധിയിലൂടെയാണ് കടന്നു പോകുന്നതെന്നും ഇത്തരമൊരു സാഹചര്യത്തില്‍ സമൂഹത്തോടുള്ള ബാധ്യത തിരിച്ചറിഞ്ഞാണ് ഇങ്ങനെയൊരു തീരുമാനം കൈക്കൊണ്ടതെന്ന് ഹോട്ടലുകളുടെ നടത്തിപ്പുകാരായ ഐഎച്ച്‌സിഎല്‍ വക്താവ് വാര്‍ത്താ ഏജന്‍സിയോട് പറഞ്ഞു.
പ്രശസ്തമായ താജ് പാലസ് അടക്കമുള്ള മുംബൈയിലെ അഞ്ച് ഹോട്ടലുകളിലും ഗോവ, നോയ്ഡ എന്നിവിടങ്ങളിലെ താജ് ഹോട്ടലുകളിലും താമസ സൗകര്യം ഒരുക്കാമെന്നാണ് ഐഎച്ച്‌സിഎല്ലിന്റെ വാഗ്ദാനം. അതേസമയം, കഠിനാധ്വാനം ചെയ്തശേഷം താജ് ഹോട്ടലുകളില്‍ വിശ്രമിക്കാന്‍ അവസരം ലഭിച്ചുവെന്ന് വ്യക്തമാക്കി പല ഡോക്ടര്‍മാരും നഴ്‌സുമാരും ട്വീറ്റ് ചെയ്തു കഴിഞ്ഞുവെന്നും വാര്‍ത്താ ഏജന്‍സിയുടെ റിപ്പോര്‍ട്ടില്‍ പറയുന്നു.
രാജ്യത്തിന് ആരോഗ്യ പ്രവര്‍ത്തകര്‍ നല്‍കുന്ന സേവനം വിലമതിക്കാനാവാത്തതാണ്. അവര്‍ക്കും കൊറോണ വ്യാപനം തടയാനുള്ള പ്രവര്‍തത്തനങ്ങളില്‍ ഏര്‍പ്പെട്ടിരിക്കുന്ന പ്രാദേശിക ഭരണകൂടങ്ങള്‍ക്കും എല്ലാ പിന്തുണയും താജ് ഹോട്ടലുകള്‍ നല്‍കുമെന്നും ഐഎച്ച്‌സിഎല്‍ വക്താവ് വ്യക്തമാക്കി.
