മലപ്പുറം: കോവിഡ് 19 പ്രതിരോധ പ്രവര്ത്തനങ്ങളുടെ ഭാഗമായി മലപ്പുറം നഗരസഭാ പരിധിക്കുള്ളിലെ മദ്യശാലകള് അടയ്ക്കാന് നിര്ദ്ദേശം. ബിവറേജസ് കോര്പറേഷന്റേയും കണ്സ്യൂമര് ഫെഡിന്റെയും മദ്യശാലകള് അടയ്ക്കാന് നോട്ടീസ് മലപ്പുറം നഗരസഭാ കൗണ്സില് നോട്ടീസ് നല്കിയിട്ടുണ്ട്. പ്രതിപക്ഷത്തിന്റെ വിയോജിപ്പിനെ മറികടന്നാണ് നടപടി.
സംസ്ഥാനത്ത് കൊറോണ പടരാന് തുടങ്ങിയതോടെ മുന് കരുതലിന്റെ ഭാഗമായി മദ്യശാലകള് അടച്ചിടണമെന്ന് ആവശ്യം ഉയര്ന്നിരുന്നു. ഈ സാഹചര്യത്തിലാണ് നഗരസഭാ കൗണ്സിലിന്റെ പരിധിയില് ഉള്പ്പെടുന്ന മദ്യശാലകള് അടച്ചിടാന് തീരുമാനിച്ചത്.
കോവിഡ് 19 പ്രതിരോധ പ്രവര്ത്തനങ്ങളുടെ ഭാഗമായി വിദ്യാഭ്യാസസ്ഥാപനങ്ങള് ഉള്പ്പെടെ അടച്ചിടാന് തീരുമാനിച്ച സാഹചര്യത്തില് നൂറുകണക്കിന് ആളുകള് വരുന്ന മദ്യശാലകള് തുറന്നുപ്രവര്ത്തിക്കുന്നത് സമൂഹ വ്യാപനത്തിനിടയാക്കുമെന്ന് കൗണ്സിലര് ഹാരിസ് ആമിയന് കൗണ്സില് യോഗത്തില് കത്ത് നല്കിയിരുന്നു. ഇതിന്റെ അടിസ്ഥാനത്തില് ബുധനാഴ്ച ചേര്ന്ന നഗരസഭാ കൗണ്സില് യോഗമാണ് മദ്യശാലകള് താത്കാലികമായി അടച്ചിടാന് നിര്ദ്ദേശം നല്കിയത്. 31 വരെയാണ് നഗരസഭാ പരിധിയിലെ മദ്യശാലകള് അടച്ചിടാനാണ് നിലവില് നിര്ദ്ദേശം നല്കിയിരിക്കുന്നത്.
അതേസമയം മദ്യശാലകള് അടപ്പിക്കാനുള്ള ഭരണസമിതിയുടെ നീക്കത്തിനുപിന്നില് ആത്മാര്ഥതയില്ലെന്നും രാഷ്ട്രീയ പകപോക്കലാണെന്നും പ്രതിപക്ഷം ആരോപിച്ചു. വൈറസ് പ്രതിരോധ നടപടികളുടെ ഭാഗമായി മദ്യശാലയിലെത്തുന്നവരുടെ തിരക്ക് നിയന്ത്രിക്കാന് വേണ്ട നടപടി സ്വീകരിക്കുകയാണെങ്കില് അതിനെ സ്വാഗതംചെയ്യുമെന്നും പ്രതിപക്ഷം യോഗത്തില് അറിയിച്ചു.
എന്നാല് മുനിസിപ്പല് ആക്ട് പ്രകാരം മദ്യശാലകള്ക്കെതിരെ നോട്ടീസ് നല്കാന് സെക്രട്ടറിക്ക് അധികാരമുണ്ടെന്ന് അറിയിച്ച് നോട്ടീസ് നല്കാന് കൗണ്സില് തീരുമാനിക്കുകയായിരുന്നു.
