ന്യൂദല്ഹി: ലഡാക്കില് നിരീക്ഷണത്തിലായിരുന്ന സൈനികന് കൊറോണ വൈറസ് ബാധ സ്ഥിരീകരിച്ചു. ലഡാക്ക് സ്കൗട്ടിലെ ലാന്സ് നായിക്കിനാണ് രോഗം സ്ഥിരീകരിച്ചിരിക്കുന്നത്. ഇറാനില് തീര്ഥാടനത്തിലായിരുന്ന ശേഷം ഫെബ്രുവരി 27ന് നാട്ടിലെത്തിയ പിതാവില് നിന്നാണ് സൈനികനിലേക്ക് രോഗം പടര്ന്നത്. ഫെബ്രുവരി 29 മുതല് നിരീക്ഷണത്തിലായിരുന്ന പിതാവിന് മാര്ച്ച് ആറിന് രോഗം സ്ഥിരീകരിക്കുകയായിരുന്നു.
ഫെബ്രുവരി 25 മുതല് മാര്ച്ച് ഒന്നുവരെ ലീവിലായിരുന്ന സൈനികന് മാര്ച്ച് 2 നാണ് തിരികെ ജോലിയില് പ്രവേശിച്ചത്. ഈ മാസം ആറിന് പിതാവിന് രോഗം സ്ഥിരീകരിച്ചയുടന് തന്നെ സൈനികനെ നിരീക്ഷണത്തിലാക്കി. തിങ്കളാഴ്ച പുറത്തു വന്ന പരിശോധന റിപ്പോര്ട്ടില് രോഗബാധ സ്ഥിരീകരിക്കുകയായിരുന്നു. നിലവില് സൈനികന്റെ ഭാര്യയും സഹോദരിയും രണ്ടു കുട്ടികളും ലഡാക്ക് എസ്എന്എം ആശുപത്രിയില് നിരീക്ഷണത്തിലാണെന്നും ദേശീയ മാധ്യമങ്ങള് റിപ്പോര്ട്ട് ചെയ്യുന്നു.
രാജ്യത്തിന്റെ വിവധ ഭാഗങ്ങളില് നിന്നായി 147 കൊവിഡ് 19 കേസുകളാണ് റിപ്പോര്ട്ട് ചെയ്തിരിക്കുന്നത്. ഇതില് 25 വിദേശികളും ഉള്പ്പെടുന്നു. കര്ണാടക, മഹാരാഷ്ട്ര എന്നിവിടങ്ങളില് നിന്നുമായി മൂന്നു മരണങ്ങളും ഇതുവരെ റിപ്പോര്ട്ട് ചെയ്തു.
