കുവൈറ്റ് സിറ്റി – ഫെബ്രുവരി 27ന് ശേഷം കുവൈത്തിൽ മടങ്ങിയെത്തിയ പ്രവാസികൾ സിവിൽ ഐഡിയും പാസ്പോർട്ടുമായി അതത് ഗവര്ണറേറ്റുകൾക്കായി നിശ്ചയിച്ച ദിവസങ്ങളിൽ മിഷ്റിഫ് ഫെയർ ഗ്രൗണ്ടിലെ ഹാൾ നമ്പർ 6 ൽ റിപ്പോർട്ട് ചെയ്യണമെന്ന് ആരോഗ്യ മന്ത്രാലയ അധികൃതർ അറിയിച്ചു.
സിവിൽ ഐ. ഡിയിലെ വിലാസമനുസരിച്ചാണ് വിദേശികൾ എത്തേണ്ടത്. ഈ കാലയളവിൽ യാത്ര ചെയ്തവർ നിർബന്ധമായും പരിശോധനക്കായി എത്തേണ്ടതാണെന്നും അല്ലെങ്കിൽ നിയമപരമായ നടപടികൾ നേരിടേണ്ടിവരുമെന്നും അധികൃതർ മുന്നറിയിപ്പ് നൽകി. കുവൈത്തിൽ കോവിഡ് 19 വ്യാപനം വർദ്ധിക്കുന്ന സാഹചര്യത്തിലാണ് പുതിയ തീരുമാനം.
12 ന് ജഹ്റ ഗവർണ്ണറേറ്റിലെ താമസക്കാരും, വെള്ളി മുബാറക് അൽ കബീർ ഗവർണ്ണറേറ്റിലെ താമസക്കാരും, ശനിയാഴ്ച ഫർവാനിയ ഗവർണ്ണറേറ്റിലെ താമസക്കാരും ,ഞായറാഴ്ച ഹവല്ലി ഗവർണ്ണറേറ്റിലെ താമസക്കാരും, തിങ്കളാഴ്ച അഹ്മദി ഗവർണ്ണറേറ്റിലെ താമസക്കാരും, ചൊവ്വാഴ്ച കുവൈത്ത് സിറ്റി ഗവർണ്ണറേറ്റിലെ താമസക്കാരുമാണ് റിപ്പോർട്ട് ചെയ്യേണ്ടത്.
വിമാന യാത്രാ വിലക്ക് ഏർപ്പെടുത്തിയത് മൂലം നാട്ടിൽ കുടുങ്ങികിടക്കുന്നവരുടെ താമസ അനുമതി പുതുക്കുന്നതിനും താൽക്കാലികമായി കാലാവധി നീട്ടി നൽകുന്നതിനും 3 മാസത്തെ അവധി അപേക്ഷകൾ സമർപ്പിക്കുന്നതിനുമുള്ള അപേക്ഷകൾ ഇന്നലെ മുതൽ സ്വീകരിച്ചു തുടങ്ങി. കോവിഡ് 19 ബാധിതരുടെ എണ്ണം കുവൈത്തിൽ 72 ആയി. ഇതിൽ 5 പേർ തീവ്രപരിചരണ വിഭാഗത്തിലാണ്
